ҮАБЗ-ын Ажлын албаны ажилчид их хэмжээний валют хил давуулан оруулж ирсэн асуудал болон өмгөөлөгч Н.Баасанцогттой холбоотой асуудлаар УИХ-ын гишүүн Б.Энх-Амгалан, Б.Баярсайхан, Ц.Сандаг-Очир, Г.Дамдинням, Ч.Ундрам нар мэдээлэл хийлээ.

УИХ-ын гишүүн Б.Энх-Амгалан: УИХ-ын хаврын чуулганы нээлтэн дээр Монгол Улсын Их хурлын дарга хоёр ажлын хэсэг байгуулснаа зарласан.  УИХ-ын даргын захирамжаар Хууль хяналтын байгууллага хуулиар хүлээсэн чиг үүргээ хэрхэн хэрэгжүүлж буйд болон хэвлэл мэдээллийн орчинд тархсан гэмт хэргийн шинжтэй мэдээллүүд нь улс орны дотоод аюулгүй байдалд сөргөөр нөлөөлөх эсэхийг судлан, санал, дүгнэлт гаргах, хууль тогтоомжийн төсөл боловсруулж, танилцуулах үүрэг бүхий ажлын хэсгийг миний бие ахалж ажиллаж байна.

Нэр бүхий өмгөөлөгч, шүүгч нартай холбоотой асуудлаар гуравдугаар сарын 16-ны өдөр бид мэдээлэл өгсөн. Энэ асуудлын талаарх нөхцөл байдлыг бидэнд мэдээлж өгөх хүсэлтийг Монгол Улсын Ерөнхий прокурор, Хууль зүй дотоод хэргийн сайд Нямбаатарт, ТЕГ, АТГ, ЦЕГ-ын дарга нарт тус тус хүсэлт явуулсан. Энэ дагуу прокурорын газраас бидэнд мэдээлэл ирсэн. Тус мэдээлэлд хэвлэл мэдээллийн хэрэгслээр олон нийтэд мэдээлэгдсэн нэр бүхий шүүгч нартай холбоотой гэмт хэргийн шинжтэй хэргийг шалгаж байгаа талаар мэдээллээ.  Мөн ҮАБЗ-ын нэр бүхий гишүүн Сэлэнгэ аймгийн Алтанбулаг боомтоор ОХУ руу авто машинтай хил нэвтэрч, буцахдаа 20 сая ам.доллар оруулж ирсэн байж болзошгүй гэх мэдээллийн ТЕГ мөрдөн шалгах ажиллагаа явуулж байгаа юм байна. Мөн өмгөөлөгч Б.Баасанцогтын зүгээс шүүгч нарт их хэмжээний мөнгө тараасан гэх асуудлаар АТГ-т хэрэг үүсгэсэн. Ерөнхийдөө энэ хэрэг шат шатны байгууллагууд дээр идэвхтэй шалгагдаж явж байна. Цаашдаа тус хэргийн эцэслэн шийдвэрлүүлэх хүртэл хамтдаа хяналт тавьж ажиллахыг хүсч байна.

Нэр бүхий шүүгч, өмгөөлөгчийн энэ хууль бус үйл ажиллагааны талаар иргэдээс бидэнд гомдол ирж байгаа. Хууль, шүүхийн байгууллагын бүх албан хаагчид ашиг сонирхлын зөрчилтэй биш. Үүн дотор байгаа хонгилын хэдхэн шүүгч, прокурор нарт хариуцлага тооцох асуудал яригдаж байна.

УИХ-ын гишүүн Ч.Ундрам: Монгол Улсын Их хурал бол хууль тогтоох, хуулийн хэрэгжилтэд хяналт тавих дээд байгууллага. Хуулийн хэрэгжилтэд хяналт тавих чиг үүргийнхээ хүрээнд ажлын хэсэг байгуулж гурван долоо хоног ажиллаж байна. Иргэдээс өмгөөлөгч Н.Баасанцогттой холбоотой өргөдөл, гомдол бидэнд ирж байгаа. Энэ хэрэг гомдлуудыг бид холбогдох газар болох АТГ- руу шилжүүлэх гэж байна. Хууль хяналтын байгууллагад үнэнч шударга ажиллаж байгаа албан хаагчид маш их бий. Тэдгээр хүмүүсийн нэр хүндийг унагаад байгаа хонгилын сүлжээг олж илрүүлж, хариуцлага тооцох ёстой. Ингэж байж ард иргэдийн хууль хяналтын байгууллагад итгэх итгэл нь буцаж сэргэх юм.

Эх сурвалж: Э.Мөнхзаяа (itoim.mn)