Өнөөдөр /2019.08.19/ Улсын комиссын өргөтгөсөн хуралдаан төрийн ордонд боллоо. Өргөтгөсөн хуралдаанд Ерөнхий сайд У.Хүрэлсүх оролцож, үүрэг даалгавар өглөө.

Тэрээр өмнөх ёсоор үглэж дуулах ажлаа энэ удаад хийлээ. Тэрээр ярианыхаа эхэнд “Цаг агаар нөхцөл байдлаас шалтгаалан ургац алдах эрсдэл байгааг анхааруулж, эртнээс төлөвлөгөөтэй ажиллахыг холбогдох албаныханд анхааруулав. Мөн ирэх жил мах, гурилын үнэ нэмэгдвэл Хүнс хөдөө аж ахуй хөнгөн үйлдвэрийн сайд Ч.Улаан хар толгойгоороо хариуцна шүү” гэчхэв.

Цаашлан  тэрээр “Эрх мэдлээ ашиглан байгалийн баялгийг олборлодог, орон нутгийг сүйтгэж байгаа нөхдүүдтэй хатуу тэмцэх хэрэгтэй. Үүнийг олон удаа хэлж байгаа. Хүний өөрийн нам засаггүй хэлж байгаа. Монголын төрд олигархууд орж ирснээр монгол төрийн үйл ажиллагаа гацаанд орж байгаа. Тиймээс дарга нар аймаг орон нутгийнхаа олигархуудтай тэмц. Хэдэн халтар цаасанд амаа үдүүлж болохгүй. Монгол төр мөнгөний өмнө, олигархуудын өмнө гудайж болохгүй гэж олон удаа хэлж байгаа. Шударгаар хөдөлмөрлөж, бизнес хийж байгаа бизнес эрхлэгчдийг хэлээгүй. Харин хууль бусаар Монголын баялгийг хулгайлж авсан олигархуудын талаар ярьж байгааг ялгаж салгаарай. Дээр нь төрийн эрх мэдлийг давхар олж авсан хүмүүст хэлж байгаа.

Цаашдаа Монголын төр бизнес улс төр хоёрыг салгах ёстой. Энэ хоёрыг салгаж байж төр ариусах юм байна. Аймаг орон нутагт ч мөн адил. Аймаг, сумын удирдлагууд байгаль орчноо хамгаалах асуудалд ихээхэн анхаарах хэрэгтэй байна.

Сая Тост тосон бумбын нурууны асуудлыг юу болж байж эргүүлж авав. Төр төмөр нударга байдаг гэдгийг ингэж харуулах хэрэгтэй. Төрийн хууль зөрчвөл ямар ч олигарх бөхийдөг юм гэдгийг харуулах хэрэгтэй. Сүүлийн 30 жил Монголын төрд дутагдсан зүйл энэ. Үүнийг цөмөөрөө хийх ёстой. Үүний өмнө битгий өвдөг сөхрөөрэй, битгий зориг шантраарай гэж захья. Иргэдийнх нь ам руу нь мөнгө чихээд, шүүх дээр очоод асуудлуудыг шийднэ гэж ярьж байгаа хүн байна. Тийм зүйл байхгүй гэж би бодож байна. Монголын шүүх, прокурор өөрчлөгдсөн. Шударга шийдвэр гаргана гэдэгт итгэж байгаа. Бүгд хонгилын шүүгч, бүгд авлигачид биш. Шударга хүмүүс энэ улс орныг удирдаж эхэлж байгаа гэж бодож байна. Тиймээс Монголын шүүх, прокурор, цагдаа гэмт хэрэгтэнтэй хатуу тэмцэх хэрэгтэй.

Архангайчууд Орхоны хөндийгөө хар, Сэлэнгэчүүд Ерөө, Хүдэрээ хар, Хэнтий Гутайн даваагаа хар, Эко алтан Заамар гээд яриад байна. Энэ бүхэн дээр аймаг орон нутгийн дарга, холбогдох дарга нар арга хэмжээ авна. ЦЕГ, ТЕГ, Засаг дарга аа энэ бүхнийг хаа мэдэв үү. Гол мөрөн чинь ширгээд дууслаа. Улс орон гэж байдаг бол замбараагүй уул уурхайтай тэмцэх ёстой” хэмээн урсгаж гарсан юм.

Ийнхүү Ерөнхий сайд У.Хүрэлсүх аймгуудын дарга нарт лүндэн буулгах явцдаа цэрэг хөдөлгөх тухай ноцтой асуудал ярилаа. Тэрээр “Эх орноо хамгаалах цаг болсон. Шаардлагатай гэвэл цэрэг армиа хөдөлгөе. Газар нутгаа хамгаалалтад авъя. Яах гэж бид цэрэг тэжээдэг юм бэ. Эх орноо хамгаалах гэж шүү дээ” хэмээн хэнхэглэлээ.

Түүний ийн ярьсныг сонссон олон иргэд бухимдаж эхэлжээ. Учир нь дарга нарын өгсөн лицензүүдийг төр хурааж дийлэхгүй болохоороо цэргүүдэд тушаал өгөх нь иргэдэд таалагдсангүй бололтой. Иргэдийн зүгээс У.Хүрэлсүхийн хэнээрхэлд унтууцаж “хулгайч, авилгач дарга нарын гараар үйлдэгдсэн хэрэгт цэрэг, арми ямар хамаатай билээ. Тэд ямар хулгайч нарын нохойд барьдаг мод уу. Ерөнхий сайд У.Хүрэлсүх олон нийтэд таалагдах арга хайж ядахдаа тайван цагт цус асгаруулахаар үг хэлчихлээ” хэмээж байна.

А.Тамир

АРДЧИЛАЛ.МН