Монголчуудын уламжлалт баяр болсон хаврын тэргүүн сарын шинийн нэгэн өнгөрөөд долоо хонолоо. Ерөнхийдөө цагаан сар хойд уулан дээгүүр аль хэдийнээ давж одсон хэрэг. Энэ жилийн хувьд өмнөх жилүүдийг бодвол сар шинийн золголт өргөн болж байх шиг. Учир нь амралт урт байснаас үүдэн хотын бөглөрөө, түгжрэл огтоос буурсангүй. Хөдөөд ч хөл хөдөлгөөн тасарсангүй. Ийнхүү Монгол даяар бүтэн долоо хоног сар шинийн баяраа шижгэр тэмдэглэлээ.

Гэвч аливаа тэмдэглэлт баярыг хүндрүүлэн тэмдэглэх дуртай бидний Монголчууд энэ удаад ч өмнөхөө давтлаа. Сар шинийн баяр дуус ч ажил, алба цуглах болов. Гэтэл Монгол даяар дахин “ажлын золголт” гэх шижгэр золголт эхлэх нь тэр. Албан байгууллага, албан тушаалтан бүр өөр хоорондоо золголтоо хийх ажээ. Тэр дундаа төрийнхөн, намынхан, аймгийнхан, сумынхан, ангийнхан гэх мэт эцэс төгсгөлгүй нүсэр урт шинэлгээ үргэлжлэх юм.

Өчигдрөөс эхлэн "ажлын золголт" гэх архидалтын шалтаг гарлаа. Төрийн ордон, яамд, агентлагууд, намууд тэр чигтээ л торгон дээлтэй, ганган хүрэмтэй, үнэтэй хөөрөгтнүүдээр дүүрлээ. Тэр ч даргадаа золголоо. Энэ ч даргадаа золголоо гэсэн "сээлфий" нүүр номоор дүүрэн. Ажил цалгардуулсан энэхүү архидалтаа зарим нь "Их золголт" гэх мэтээр мундаг нэрлэчихсэн байх шиг. Тэр “их золголт”-ынх нь хойморт төрийн сайдууд ханхайх ч шиг.

Амар ч амар ч, шинэлж шинэлж ирчихээд ажлын ѳдрѳѳр албан ѳрѳѳндѳѳ дахиад л ширээ засаж, ууц тавьж ууж, идэх юм. Цаашилбал унасан машин, өмссөн хувцас, барьсан хөөрөг, золголтын мөнгө зэргээрээ өөр хоорондоо уралдаад сүйд болох юм. Тэр ч бүү хэл “ажлын золголт” дээрээ юу ѳмсѳх үү, яах уу гээд бөөн асуудал болж байна гэнэ. Ингэж “ажлын золголт”-оо эхлүүлсэн тэд үргэлжлүүлэн бөөн бөөнөөрөө нэг нэгнийдээ золголт хийж эхэлжээ.

Ер нь энэ сарыг дуустал их золголт үргэлжлэх нь лавтай. "Ажлын золголт"-ын араас залгаад "нутгийн золголт"-ууд үргэлжлэнэ. Аймаг, сумаараа "Бөхийн Өргөө", "Аса" циркэд цуглаж золгож байж л Монгол түмний минь цагаан сар шувтрана даа.

Монгол ахан дүүс минь өөр хоорондоо, амар мэндээ мэдэлцэлгүй л яахав. Гэлээ гэхдээ төрийн ажлыг гацаан, гацаан. Түмэн олныг чирэгдүүлэн, бухимдуулан нүсэр золголтыг яахан хийж болох билээ. “Ажлын золголт” гэх архидалтаа дуусгаад ажилдаа оръё оо Монголчуудаа...

А.Төмөр

АРДЧИЛАЛ.МН