“Төвлөрлийг сааруулах замаар иргэдэд төрийн үйлчилгээг ойртуулах нь” сэдэвт Ардчиллын IV чуулган 9 дүгээр сарын 26-ны өдөр Туушин зочид буудалд болж байна.

Ардчилсан засаглал дахь "Төр-Иргэн"-ий хамтын ажиллагааг тойрсон асуудлуудыг өргөн хүрээнд хэлэлцэх зорилго бүхий Ардчиллын IV чуулган юм. Чуулганд Монгол Улсын Засгийн газрын Хэрэг эрхлэх газрын дэд дарга У.Бямбасүрэн, Монгол Улсын БСШУС-ын яамны сайдын зөвлөх, доктор, профессор А.Цанжид, Конрад-Аденауэр Сангийн суурин төлөөлөгч Йоханн Фурманн, ХБНГУ-аас Киелийн захиргааны дээд сургуулийн захирал, профессор Паул Витт, Заксен муж улсын парламентын гишүүн Йорг Киэзеветтер, ХБНГУ-ын Киелийн захиргааны дээд сургуулийн захирал, профессор Паул Витт, ЗГХЭГ-ын шинжээч Д.Мөнх-Эрдэнэ нарын хүмүүс оролцохоос гадна ЗГХЭГ, Яам, Агентлагын төлөөлөл, эрдэм шинжилгээний байгууллагын судлаач, Их, дээд сургуулийн багш, профессорууд болон мэргэжлийн судлаачид, ТББ-ын төлөөлөл 200 гаруй төлөөлөгч оролцож байна.
Удирдлагын академи, ХБНГУ-ын Конрад-Аденауэрын сангаас хамтарч зохион байгуулж буй уг чуулганд Засгийн газрын хэрэг эрхлэх газар (ЗГХЭГ)-ын ахлах референт П.Зоригтбаатар Засгийн газрын 2016 оны 350 дугаар тогтоолоор Төрөөс төвлөрлийг сааруулах бодлого боловсруулан хэрэгжүүлж байгааг онцлов.

Тэрээр “Жил ирэх тусам хэт төвлөрөл нэмэгдэж, Улаанбаатар хотноо нийт хүн амын 50 орчим хувь нь амьдарч байгаа.Төрийн ихэнх үйлчилгээ болон эрх мэдэл яамдад төвлөрснөөс үүдэн иргэд чанартай, түргэн шуурхай үйлчилгээ авахыг хүсч, ийнхүү нийслэлд шилжин суурьших нь элбэг байгаа юм. Уг асуудлыг шийдвэрлэхээр Засгийн газраас энэ онд Төрийн болон нутгийн удирдлагын байгууллагын чиг үүргийг дахин хуваарилах тогтоол баталсан. Тогтоол хэрэгжснээр орон нутгийн иргэдэд хүргэж буй төрийн үйлчилгээний чанар, хүртээмж сайжирч, нэр төрөл олшрох юм.” гэж хэллээ.

Энэ тогтоолын хүрээнд бүх төрийн байгууллагуудад чиг үүргийн шинжилгээ хийж, дахин хуваарилах ажлыг хийх юм байна. Одоогоор БХБЯ болон ХНХЯ дээр чиг үүргээ дахин хуваарилах талаар техникийн ажлын хэсэг ажиллаж эхэлжээ.

П.Зоригтбаатар энэ үеэр “Судалгааны ажлыг энэ ондоо багтаан дуусгаж, холбогдох хуулиудад өөрчлөлт оруулах асуудал ярина. Өнөөдрийн чуулганд оролцож буй төлөөлөгчдийн зүгээс орон нутагт төсвийн эрх мэдэл олгох ёстой гэсэн санал хэлж байгаа. 2011 онд баталсан Төсвийн тухай хуулиар аймаг, сумдад Орон нутгийн хөгжлийн сан бий болгосон. Сангаас гарах зарцуулалтыг иргэдийн оролцоотой шийдвэрлэж байгаа юм. Харин томоохон хөрөнгө оруулалттай холбоотой төсвийг орон нутагт шилжүүлэх боломжгүй. ” гэж ярив.

Конрад-Аденауэрын сангийн Суурин төлөөлөгч Йохан Фурманн “ХБНГУ-ын хувьд төвлөрлийг сааруулах, төрийн үйлчилгээг иргэдэд тэгш, хүртээмжтэй хүргэх чиглэлд ихээхэн дэвшил гаргасан улс. Манай улсын хувьд парламентын аливаа шийдвэрийг иргэд дэмжихгүй бол тухайн шийдвэрээ цуцлах, эсхүл иргэдийн саналыг тусган дахин боловсруулдаг. Энэ нь төрөөс иргэдэд хүрч буй үйлчилгээг тэгш, хүртээмжтэй байлгахад чухал үүрэг гүйцэтгэж байгаа юм. Монгол Улсын хувьд төвлөрлийг сааруулахын тулд төр ямар ажил хийх шаардлагатай байгаа талаар иргэд, олон нийтийн дунд тогтмол хэлэлцүүлэг өрнүүлэх нь чухал” хэллээ.

Харин ХБНГУ-ын Заксен муж улсын парламентын гишүүн Иорг Киэзветтер “ХБНГУ-ын үндсэн хуулийн дагуу мужууд асуудлуудын хүрээнд шийдвэр гаргах эрхтэй. Үндсэн хуулиар 16 муж улсын бие даан гаргах шийдвэрийг нарийн зааж өгсөн. Мужуудын түвшинд юу шийдвэрлэх вэ, мөн Холбооны түвшинд ямар асуудлыг шийдвэрлэх вэ гэдэг нь маш тодорхой байдаг. Иймээс асуудлыг шийдвэрлэх үйл явцад мужийн Парламент болон Холбооны Парламент нь ямар үүрэгтэй  нь бас тодорхой байдаг юм. 16 муж бүр Холбооны хүрээний бодлогыг баримтладаг.

Гэхдээ мужийнхаа тодорхой хэмжээний онцлогийг шингээсэн байдлаар бодлогын хүрээнд тулгарсан асуудлыг шийдвэрлэх бүрэн боломж олгогдсон. Мөн санхүүжилтийн асуудал маш чухал. Харин тухайн мужууд тодорхой асуудлуудаа шийдвэрлэх боломжтой санхүүжилттэй байх хэрэгтэй юм. Монгол Улсын хүн амын 50 орчим хувь нь Улаанбаатарт оршин сууж байна. Тиймээс өөрийн орны онцлогт тохирсон төсвийн болон бусад бодлогын шийдвэр гарах нь чухал юм.” хэмээн сэтгүүлчийн асуултанд хариуллаа.

www.ardchilal.mn Б.Баярмаа