Онцгой байдлын ерөнхий газраас сүүлийн хэд хоногт их хэмжээгээр орсон борооны улмаас үүсэээд байгаа нөхцөл байдлын талаар цаг үеийн мэдээлэл хийлээ.  

Энэ жил хавар ихэнх нутгаар гандуу байсан ч 06 дугаар сарын сүүлээр усархаг бороо орж олон жилийн дунджаас усны түвшин нэмэгдэж, зарим газруудад үеэр усны гамшиг нүүрлээд байгааг ОБЕГ-ын тэргүүн дэд дарга, бригадын генерал Г.Ариунбуян мэдээлэлсэн.

Тэрээр “Баян-Өлгий аймгийн нутаг дэвсгэрт долдугаар сарын 14-16-ны өдрүүдэд орсон усархаг аадар борооны улмаас Өлгий сумын 2, 3, 4, 9, 11, 12, 13 дугаар багийн 530 айл өрхийн 2512 хүн гамшигт нэрвэгдэж, гэр, байшин, хашаа, хороо нь усанд автсан 3 иргэн гэмтэж бэртсэн ч тухайн үед яаралтай тусламж авч, Улаанбаатар хот руу эмнэлгийн тусламж үйлчилгээ авахаар татсан байгаа. Эдгээр хохирол амссан 225 өрхийн 1566 хүнийг аюулгүй газарт гаргаж, 185 өрхийн 668 иргэнийг 8 байрлалд тор хоргодох байраар ханган, 58 өрхийг нүүлгэн шилжүүлсэн. 5.0 км далан босгож, 300 м шуудуу татан,  эрүүл мэндийн салбар иргэдийг эрүүл мэндийн үзлэгт бүрэн хамруулах үйл ажиллагааг зохион байгуулж 82 өрхийн 177 иргэнд эрүүл мэндийн анхан шатны үйлчилгээ үзүүлж, 60 хүнд эм бэлдмэл тараагаад байна.

Тухайн суманд үүссэн гамшгийн аюулаас иргэдийн амь нас, эрүүл мэндийг хамгаалах, хойшлуулшгүй сэргээн босгох ажиллагааг хэрэгжүүлэхээр давхардсан тоогоор тус аймгийн Онцгой байдлын газрын 96, Цагдаагийн газрын 149 алба хаагч, Мэргэжлийн хяналтын газрын 23, Газрын харилцаа, барилга хот байгуулалтын газрын 10, Зам засвар, арчлалтын “Жол” ХХК-ийн 23 ажилтан, орон нутгийн 105 иргэн, Ховд аймгийн Онцгой байдлын газрын 9, Увс аймгийн Онцгой байдлын газрын 5, Говь-Алтай аймгийн Онцгой байдлын газрын 7, Завхан аймгийн Онцгой байдлын газрын 9, Зэвсэгт хүчний 340 дүгээр ангийн 92, Зэвсэгт хүчний 311 дүгээр ангийн 35, Хилийн цэргийн 0165 дугаар ангийн 55 алба хаагч, нийт 618 хүн, 107 нэгж техник хэрэгсэлтэйгээр ажиллаж байна.

2016 оны дугаар сарын 10-ны өдөр тухайн аймагт хүчтэй аадар бороо орсон.Тухайн үед 360 гаруй айл өрхийн 1600 гаруй иргэн үерт автсан. Одоогийн нөхцөл байдлыг урьдчилсан байдлаар тооцвол түүнээс 4-5 дахин илүү хохирол амсаад  байна. Өөрөөр хэлбэл 2016 онд 2 тэрбум төгрөгний хохиол учирсан бол өнөөдөр 10 гаруй тэрбум төгрөгний хохиролтой байна.  Хохирол амссан иргэдэд сэтгэл санааны дэмжлэг үзүүлэх халуун хоол, байрлах газраар хангаад байгаа”гэлээ.

Төв аймгийн Борнуур суманд орсон хүчтэй аадар борооны улмаас 70 айл өрх 10 аж ахуй нэгж усанд автжээ. Энэ үеэр тус нутагт харъяалагдах “Шавартайн гүүр”-ний тулгуур багананд суулт өгч тээврийн хэрэгсэл зорчих боломжгүй болж, сумын төвийн 530 км эвдэрсэн байна. Үүнийг холбогдох АЗЗА-ынхан сэргээн засварлах ажлын эхлүүлж байгааг мэдэгдлээ.

Эх сурвалж: Ardchilal.mn