Морин хуур олон улсын VI наадам тун удахгүй болох гэж байна. 2008 оноос анх зохион байгуулагдаж хоёр жил тутамд нэг удаа болдог тус наадамтай холбоотой мэдээллийг зохион байгуулагчид хийлээ. Дэлхийн морин хуурын холбооны санаачлагаар Нийслэлийн Соёл Урлагийн газар болон мэргэжлийн урлагийн байгууллагууд дэмжин явуулахаар болсон морин хуур наадам нь морин хуурыг дэлхий дахинд таниулах, морин хуурын ардын уламжлалт ая дан, тоглох араг барилыг түгээн дэлгэрүүлэх, морин хуур судладаг гадаад дотоодын эрдэмтдийн хамтын ажиллгааг хөгжүүлэх зорилготой юм.

Уг наадам нь морин хуур сонирхогчдын уралдаан, мэргэжлийн морин хуур урлаачид гэсэн хоёр төрлөөр явагдах бөгөөд морин хуур урлаачдын бүтээлээр үзэсгэлэн гаргаж, уулзалт хэлэлцүүлгүүдийг зохион байгуулахаар болжээ. АНУ, Бельги, БНХАУ-ын ӨМӨЗО, ОХУ-ын Буриад, Японы нийт 30 гаруй гадаадын морин хуур, урлаач Монгол улсын мэргэжлийн хөгжмийн 5 театр чуулгаас 100 гаруй уран бүтээлчид, эрдэмтэн судлаачид, хөдөө орон нутгийн соёлын өвийг тээгчид оролцох гэж байгааг энэ үеэр мэдээлэлээ.

Морин хуурын олон улсын наадмыг 5 сард явуулдаг байсан бол энэ жил 6 сарын сүүл 7 сарын эхээр зохион байгуулах болсон нь “Мөнх тэнгэр” Монгол туургатны соёл урлагийн наадам болох гэж байгаатай холбогдуулан хойшлуулах болсон хэмээн Нийслэлийн Соёл Урлагийн газрын дарга Ж. Дамдинцэрэн мэдэгдлээ.

Энэ жил морин хуур орчин цагт хэрхэн хөгжиж буйг, төр засгаас ардын урлаг, морин хуурыг дэлгэрүүлэх талаар хэрхэн дэмжиж ажиллаж байгаа талаар хэлэлүүлэг хийж тодорхой шийдэлд хүргэх арга хэмжээ авах тал дээр анхаарч ажиллаж байгаагаараа онцлог болох болно гэж "Улсын филормон"-ийн уран бүтээлийн албаны дарга  З.Хосбаяр хэллээ.

Анх 2008 онд морин хуурын наадам зохион байгуулахад  4 улсын далбаатай байсан бол 9 улсын далбаа болон нэмэгдсэнийг “Дэлхийн морин хуурын холбоо”-ны наадмын ерөнхий зохион байгуулагч, Морин хуурын чуулгын менежер Ж.Уугантуяа онцоллоо. “Энэ удаагийн наадамд 5 улсын уран бүтээлчид оролцож байгаа хэдий ч 9 далбааг байрлуулсан нь дэлхийн 9 улсад морин хуур хөгжмийг хөгжүүлж байна. Оролцогч улсуудаас гадна оролцоогүй улсын морин хуурчид мэндчилгээ дэвшүүлж тоглолтонд оролцох юм. Хаалтын үйл ажиллагаанд илүү өргөн хүрээнд хийхээр төлөвлөж, гадны оролцогчид маань өмнөх наадмуудад бидний бүтээлийг тоглож хүргэдэг байсан бол энэ жил морин хууранд зориулан бүтээсэн өөрсдийн бүтээлээ тоглон үзүүлэх гэж байна. Үүнээс бид морин хуурыг дэлхийд түгээн дэлгэрүүлж буй мэргэжлийн түвшний хөгжим болж гэж үзэж болно. Морин хуур урлал Өвөр монголд маш хурдацтай хөгжиж, талх шиг үйлдвэрлэдэг болсон байна. Түүнчлэн Өвөр Монголчууд морин хуур тоглож сурсан хүнд цалин өгч байна. Иймд Морин хуурыг түгээн дэлгэрүүлэх, дэмжиж ажиллахыг уриалж байна” гэлээ.

“Морин хуур” олон улсын VI наадам 6-р сарын 30-наас 7-р сарын 05-ныг хүртэл зохион байгуулагдна.