ТЕГ-ын дарга асан Б.Хурцыг Элчин сайдаар томилох эсэх асуудалтай холбогдуулан УИХ-ын гишүүн Ж.Батзандан, Л.Болд нарын гишүүд 2017 оны арванхоёрдугаар сарын 15-нд бүрэн эрхийнхээ хүрээнд иргэдийн төлөөлөл оролцсон нээлттэй хэлэлцүүлгийг Төрийн ордонд хийсэн. Энэ хэлэлцүүлэгт УИХ-ын гишүүн Ц.Нямдорж, Л.Оюун-Эрдэнэ нар оролцож байр сууриа илэрхийлж байсан юм.

Тэр өдөр нь УИХ хаалттай хуралдаж, Б.Хурцыг БНСУ-д суух Элчин сайдаар илгээхээр дэмжиж байлаа.

Тэгвэл ТЕГ-ын дарга Б.Хурц дээрх хэлэлцүүлгийг зохион байгуулсан асуудлаар АТГ-т гомдол гаргажээ.

Үүний дагуу АТГ хэлэцүүлгийг зохион байгуулсан, түүнд оролцсон гишүүдэд эрүүгийн хэрэг үүсгэсэн гэх мэдээлэл байна. Тодруулбал, УИХ-ын гишүүн Ж.Батзандан, Л.Болд, Ц.Нямдорж, Л.Оюун-Эрдэнэ нарт эрүүгийн хэрэг үүсгэж , өнөөдөр /2018.4.25./ зарим гишүүнээс нь байцаалт авч эхэллээ.

Ерөнхий сайд асан С.Баяр, ТЕГ-ын дарга асан Б.Ариунсан нарын бие мууджээ

АТГ-аас Монгол Улсын 25 дахь Ерөнхий сайд С.Баяр, 28 дахь Ерөнхий сайд Ч.Сайханбилэг нарыг яллагдагчаар татан шалгаж байгаа. Энэ хүрээнд тэднийг ШШГЕГ-ын харьяа цагдан хорих 461 дүгээр ангид саатуулаад байгаа юм.

Мөн ЗГХЭГ-ын дарга асан С.Баярцогт, ТЕГ-ын даргаар ажиллаж байсан Б.Ариунсан, "Эрдэнэс Монгол" ХХК-ийн Гүйцэтгэх захирал асан Б.Бямбасайхан нарыг АТГ-аас Оюутолгойн төсөлтэй холбогдуулж “Батлагдсан гэрээ эрх зүйн баримт бичгүүдийг батлахдаа эрх мэдэл албан тушаалаа урвуулан ашиглаж илт хууль бус шийдвэр гаргаж бусдад давуу байдал олгосон байж болзошгүй” гэх хэрэгт буруутган шалгаж байгаа.

Тэгвэл яллагдагчаар татан шалгагдаж байгаа эрхмүүдээс С.Баяр, Б.Ариунсан нарын бие муудсан талаар ХЭҮК-ийн дарга Ж.Бямбадорж ярилцлага өгчээ. Тэрбээр ярилцлагадаа Цагдан хорих 461 дүгэ"эр ангид бүх хүн яг ижил нөхцөлтэй байдаг. Эмнэлгийн тусламж ч цаг алдалгүй авдаг болсон. Хамгийн сүүлийн жишээнээс дурьдвал С.Баяр харшил, багтраа өвчнөөс болж бие нь муудсан, эмнэлгийн тусламж цаг алдалгүй үзүүлсэн. Б.Ариунсан тулуй, чихрийн шижин өвчин хүндэрсний улмаас мөн тэндээ эмнэлэгт эмчлүүлж байгаа" гэжээ.

Экс Ерөнхий сайдуудыг Оюутолгой төслийн хүрээнд Монгол Улсын Засгийн газар, “Айвенхоу Майнз Монголия Инк” ХХК, “Айвенхоу Майнз Лимитед”, “Рио Тинто Интернэшнл Холдингс Лимитед” компанийн хооронд 2009 оны 10 дугаар сарын 6-ны өдөр байгуулсан хөрөнгө оруулалтын гэрээ, хувь нийлүүлэгчдийн гэрээ, 2015 оны 5 дугаар сарын 18-ны өдөр Далд уурхайн бүтээн байгуулалт, санхүүжилтийн төлөвлөгөөг батлахад нэр бүхий албан тушаалтнууд эрх мэдэл, албан тушаалын байдлаа урвуулан ашиглаж, илт хууль бус шийдвэр гаргаж, бусдад давуу байдал бий болгон хохирол учруулсан байж болзошгүй хэрэгт буруутгаж буй.

Ж.Батзандан: Монгол Улсын прокурор мафийн талд ажиллаж байна

УИХ-ын гишүүн Ж.Батзандан АТГ-т мэдүүлэг өгөөд гарч ирсэн даруйдаа сэтгүүлчдэд мэдээлэл хийлээ.

Тэрбээр “Өнгөрсөн оны арванхоёрдугаар сард УИХ-ын 40 гаруй гишүүн снааачлага гаргаж тухайн үеийн Тагнуулын ерөнхий газрын даргаар ажиллаж байсан Б.Хурцтай холбоотой ирсэн 10 гаруй өргөдлийн талаар иргэдийг сонсох нээлттэй хэлэлцүүлгийг УИХ-д зохион байгуулсан. Тэр  өргөдөл С.Зоригийн амийг хөнөөсөн хэрэгт буруутгагдан ял эдэлж буй Содномдаржаа, Чимэгээ нарын гэр бүлийнхнээс ирсэн. Мөн Эрдэнэтийн 49 хувийг Худалдаа хөгжлийн банкинд авч өгөх үйл ажиллагаанд Б.Хурц оролцсон гэдгээ телевизээр мэдэгдсэн. Үүнтэй холбоотой өргөдөл гомдол иргэдээс ирсэн. Тагнуулын газрын ажилтан Цогтбаатар гэдэг хүний гэр бүлээс Тагнуулын газрын дарга  Б.Хурц дарамталдаг тухай гомдол ирсэн. Гэтэл өнөөдөр АТГ-ын мөрдөн байцаагч Дамдинсүрэн Б.Хурцтай холбоотой, С.Зоригийн хэрэгтэй холбоотой асуудлыг ярьж байгаа УИХ-ын гишүүдэд Эрүүгийн хэрэг үүсгэх асуудлыг ярьж эхэлж байна. Өнөөдөр надаас Б.Хурцын гомдлын дагуу гэрчийн мэдүүлэг авч, Төрийн ордонд иргэдийг сонсох нээлттэй хэлэлцүүлэг зохион байгуулсныг буруутгаж байна” гэв.

Мөн “Нийтийн сонсгол хийж байгаа гишүүдэд өнөөдрөөс Эрүүгийн хэрэг үүсгэхээр АТГ, прокурор ажиллах юм байна. Би өнөөдөр АТГ-т гэрчийн мэдүүлэг өглөө. Өчигдөр /2018.04.24/ 17.00 цагт Л.Болд гишүүнийг дуудаж мэдүүлэг авсан. Өөрөөр хэлбэл “Эрдэнэт”, С.Зориг агсантай холбоотой асуудлыг яривал Эрүүгийн хэрэг үүсгэнэ шүү гэж сануулж байгаа юм байна гэж би ойлголоо. Ард түмнээс сонгосон гишүүдийг айлган сүрдүүлэх ажиллагаагаа АТГ эхлүүллээ. Төрд шургалсан мафийн бүлгийн өмнө УИХ-ын гишүүд сөгдөж болохгүй. Эцсээ хүртэл тэмцэнэ. Би нийтийн сонсголоо хийнэ. Надад айх юм байхгүй” гэлээ.

Тагнуулын ерөнхий газрын дарга асан Б.Хурц УИХ-ын гишүүн Ж.Батзанданг заналхийлсэн асуудлаар “Б.Хурц Төрийн ордонд орж ирээд намайг ална гэж заналхийлсэн. Одоохондоо алчихаагүй л бйана. Энэ хэргийг шалгаж өгөөч гэж прокурорт хүсэлт гаргасан ч одоо хүртэл шалгаж өгөөгүй. Монгол Улсын прокурор Б.Хурцын талд буюу мафийн талд ажиллаж байгаа гэдгийг би хэлье. “АТГ-т Б.Хурцын цэргүүд, гар хөл сууж байна. Өнөөдөр хүртэл надад Б.Хурц даргын гомдлын дагуу таныг шалгана гэнэ. Дарга нь захиалга өгөөд шалгуулдаг юм байна. Гэхдээ Монголд хууль гэж юм бий. Б.Хурц, Ц.Элбэгдорж гэдэг хүмүүс өнөөдөр хууль хяналтын байгууллагыг гартаа оруулчихаад мафийн шинжтэй тогтолцоог бий болгочихоод дуртай хүнээ хэлмэгдүүлж, шорон гяндангаар айлгаж байна. Би үүнийг эсэргүүцэж байгаа” гэв.

Г.Тэгшсүрэн