Ховд аймгийн ИТХ өнгөрсөн долоо хоногт ээлжит 5-р хурлаа 2 өдөр хийлээ. Энэ удаагийн хурлаар аймгийн ирэх оны төсөв зэргээс гадна аймгийн ИТХ-ын дарга Г.Пүрэвганди, Засаг дарга Д.Галсандондог нарт итгэл үзүүлэх эсэх зэрэг асуудлыг хэлэлцсэн байна. Гэвч энэ нь эргээд хууль зөрчсөн асуудал үүсгэжээ. Өнгөрсөн зургадугаар сард Д.Галсандондогт итгэл үзүүлэх эсэх асуудлаар санал хураалт явуулаад аймгийнхаа засаг даргаар хэвээр нь үлдээсэн юм билээ. Хуулиндаа ингэж итгэл үзүүлэхээр болсон бол нэг жилийн хугацаанд дахин ийм асуудал оруулж ирэх нь хориотой байдаг аж. Харин хурлын төлөөлөгч нарын үзэж байгаагаар аймгийн асуудалд УИХ-ын гишүүн С.Бямбацогт хэтэрхий их орооцолдож, өөрийн гар хөл бологсодоор аймгийг удирдуулахаар хэтэрхий их улайрч байгаа аж. Бямбацогтын хувьд баруун аймгуудын бүхий л тендерийг өөрийн талын компаниудад өгдөг, түүнийг нь Д.Галсандондог эсэргүүцдэг учраас ийм асуудал үүсч байгаа гэдгийг эх сурвалж хэлж байгаа юм. Гишүүний төрсөн дүү С.Балжинням гэж нөхөр саяын хурлын өмнөхөн очиж хурлын төлөөлөгчдийг дайлж цайлсан ч сураг байна. Гэвч 19:18-ын харьцаагаар дөнгөж данган Галсандондогоо “ялж” авчээ. Харин эргээд ИТХ-ын даргаа огцоруулах асуудлыг төлөөлөгчид оруулж ирэн 60 гаруй хувиар Г.Пүрэвганди албан тушаалаасаа огцорчээ. Ингээд  ИТХ-ын даргыг огцоруулсантай холбоотой 10 хоногийн завсарлагыг МАН-ын бүлэг авсан байна.   

Д.Галсандондог бол Ховд аймгийн МАН-ын хорооны дарга бөгөөд 2014 онд албан тушаалаа авснаас хойш 3 шатны сонгуульд намаа ялалтанд хүргэсэн гавьяатай нэгэн. Тиймдээ ч саяхан болсон намынхаа их хуралд өндөр байр суурьтай оролцсон юм билээ. Гэвч харамсалтай нь “Намынхаа эв нэгдлийг хангаж чадлаа” хэмээн индэр дээрээс хашгирч байсан нөхөд намынхаа сунгаанд ялагдсан уураа гаргаж, хариугаа авахын тулд намынхаа анхан шатны удирдлагуудаар ийнхүү оролдож эхэллээ. Ийм асуудал Баян-Өлгийн аймагт ч өрнөсөн байна. Эдгээр асуудлыг шалгаж, цэгцэлэхээр УИХ-ын гишүүн Д.Тогтохсүрэн тэргүүтэй Хяналтын хорооныхон Ховд, Баян-Өлгийг зорьсон байна.

МАН-ын муухай харагдуулж байгаа зүйлсийн тоонд “60 тэрбум”, “33-ийн бүлэг” зүй ёсоор орно. Гэвч тэд олон нийтэд зориулж элдэв сайхныг донгоддог мөртлөө ар хударгаар нь бохир улс төрөө хийсээр л байгаа. Энэ ч даамжирч сүүлдээ ийнхүү намынхаа анхан шатаар оролдож, цаашлаад хахир хатуу өвлийн цагт аймгуудыг удирдлагагүй болгох гэж байна. Үүний дүнд хэн хохирох вэ? Малчид, ард иргэд л хамгийн ихээр хохирч, өвлийн бэлтгэл, цас зудны хангамж цагтаа хүрэхгүй, хийгдэхгүй болно гэсэн үг. Монгол улсын Ерөнхий сайдаар томилогдож, намынхаа даргыг авсан У.Хүрэлсүх тогтвортой байдлыг хангаж, ажлаа цаг алдалгүй хийх ёстой гэдгээ хэлсэн. Харин дээрх асуудал бол зүгээр нэг намын хорооны дарга, нэг аймгийн засаг даргын асуудал биш бөгөөд тогтвортой байхыг зорьж буй Ерөнхий сайдаа оролдож байгаа хэлбэр юм. Тиймээс энэ асуудал дээр анхаарлаа хандуулж, асуудлыг үнэн зөв, ард түмэнд ашигтай байдлаар шийдэх ёстойг Ерөнхий сайдад сануулах нь илүүц биз ээ.