НИТХ-ын дарга Ц.Сандуй өөрийн хүсэлтээр үүрэгт ажлаасаа чөлөөлөгдөх хүсэлт өгсөн. Тэгвэл түүний оронд нэр дэвшихээр гурван эрхэм тодорчээ. Тодруулбал, НИТХ-ын даргад таван хүн нэрээ дэвшүүлсэн байна. Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан,  Багануур дүүргийн Засаг дарга Ц.Сандаг-Очир, Нийслэлийн Жижиг дунд үйлдвэрлэлийг дэмжих төвийн дарга Д.Баярсайхан, НИТХ-ын төлөөлөгч Оюуны ундраа группын захирал Ц.Амарсайхан, Зорчигч тээвэр нэгтгэл ОНӨҮГ-ын захирал Г.Төмөрбаатар гэсэн таван хүн нэр дэвшсэн аж.

Таван нэр дэвшигчээс Нийслэлийн МАН-ын хорооны тэргүүлэгчдийн олонхийн саналыг Ж.Батбаясгалан авсан байна. Түүний араас Д.Баярсайхан, Г.Төмөрбаатар нар саналын тоогоороо жагсчээ.

Тэднээс хамгийн олон санал авсан хүн нь маргааш болох НИТХ-ын ээлжит хурлаар НИТХ-ын даргаар сонгогдох магадлалтай юм.  

Ж.Батбаясгалан

Нийслэлийн Засаг даргын орлогч, НИТХ-ын төлөөлөгч Ж.Батбаясгалан нь НИТХ-ын Тэргүүлэгчдийн нарийн бичгийн дарга, НИТХ дахь МАН-ын бүлгийн ажлын албаны даргаар ажиллаж байсан туршлагатай нэгэн. 

Тэрбээр Москва хотын 779-р сургууль, нийслэлийн “Эрдмийн Ундраа” цогцолбор сургууль, Түшээ дээд сургуулийг Эрхзүйч мэргэжлээр төгссөн. Хуульч, эрхзүйч мэргэжилтэй.  МУИС-ийн Хууль зүйн сургуулийн магистрант аж.

• 2004-2008 онд УИХ-ЫН Тамгын газарт УИХ-ын гишүүний туслах, УИХ-ын гишүүний бие төлөөлөгч,
• 2008-2012 онд  НИТХ-ын Тэргүүлэгчдийн нарийн бичгийн дарга,
• Нийслэлийн Гэмт хэргээс урьдчилан сэргийлэх ажлыг зохицуулах зөвлөлийн нарийн бичгийн дарга, 
• Монгол Улсын Шүүхийн сахилгын хорооны гишүүн, Монгол Улсын Ерөнхийлөгчийн дэргэдэх Шашны зөвлөлийн гишүүн,
• 2012-2016 онд Нийслэлийн Иргэдийн төлөөлөлөгчдийн хурал дахь МАН-ын бүлгийн ажлын албаны дарга зэрэг сонгуульт ажлуудыг хийж байжээ.

Д.Баярсайхан

Д.Баярсайхан нь 1992 оноос хойш дүүрэг болон нийслэлийн ИТХ-ын төлөөлөгчөөр олон удаа сонгогдон өдгөө НИТХ-ын тэргүүлэгч, Нийслэлийн Жижиг дунд үйлдвэрлэлийг дэмжих төвийн даргаар ажиллаж байгаа.

 Тэрбээр Нийслэлийн 28 дугаар дунд сургуулийг 1976 онд төгссөн. Дархан хотын Политехникумыг технологич мэргэжлээр 1979 онд төгссөн. МУИС-ийг эдийн засагч мэргэжлээр 1987 онд төгссөн. Удирдлагын академийг 2001 онд төрийн удирдлагын арга зүйч зохион байгуулагч мэргэжлээр төгссөн. Удирдлагын академийг 2002 онд төрийн удирдахуйн ухааны магистр.

•  1979 оноос 1982 он Мах консервийн комбинатад нормчин,
• 1985 оноос 1989 он Цэргийн худалдааны трестэд мэргэжилтэн, орлогч дарга,
• 1989-1991 он Худалдааны 4-р конторт бригадын дарга, дэлгүүрийн дарга,
• 1991 оноос Их баян нуур ХХК-ийн захирал,
• 2000 оноос СХД-ийн Засаг даргын орлогч 2004 оноос ИТХ-ын дарга, 2008 оноос нийслэлийн ЖДҮ-ийн төвийн дарга
• Сонгуульт ажил: МАН-ын бага хурлын гишүүн, НАМЭХ-ны Удирдах зөвлөлийн гишүүн, нийслэлийн МАН-ын хорооны тэргүүлэгч, СХД-ийн МАН-ын хорооны дарга, СХД-ийн НАМЭХ-ны дарга, НИТХ-ын төлөөлөгч, НИТХ-ын төлөөлөгч.

Г.Төмөрбаатар

Намын хорооны тэргүүлэгчдийн олонхийн саналыг авсан гурав дахь эрхэм нь Г.Төмөрбаатар. Тэрбээр дүүрэг нийслэлийн ИТХ-ын төлөөлөгчөөр сонгогдон явсан төдийгүй Сүхбаатар дүүргийн Засаг даргаар ажиллаж байсан юм.

Тэрбээр Завхан аймгийн Их-Уул сумын дунд сургуулийг 1980 онд, Тосонцэнгэл хотын 10 жилийн I сургуулийг 1982 онд төгссөн. МУИС-ийн Эдийн засгийн сургуулийг 1993 онд, Удирдлагын академийг удирдахуйн ухааны чиглэлээр 2003 онд тус тус төгссөн.

•  АА-ын дугаар ангид салаа ротын ХЗЭ-ийн хороон даргаар 1985-1989,
• “Ширэвгэр” ХХК-ийн захирлаар 1990-2001,
• Сүхбаатар дүүргийн МАХН-ын хорооны даргаар 2006-2009,
• Сүхбаатар дүүргийн ЗДТГ-ын  даргаар 2009-2011 онд ажилласан. “Автобус-1” ОНӨҮГ-ын захирал.
• Дүүргийн ИТХ-ын төлөөлөгч

Нийслэлийн МАН-ын хорооноос олонхийн санал авсан эдгээр 3 эрхмийг намын Удирдах зөвлөлийн хурлаар хэлэлцүүлэхээр нэрийг нь дэвшүүлсэн байна.

МАН-ын Удирдах зөвлөлийн хурал өчигдөр нууцаар хуралдсан гэх мэдээлэл байгаа юм.