Монголын үндэсний бөхийн Ээлжит бус 'Их Эе' ирэх ням гаригт /2017.05.28/ Улаанбаатар хотноо хуралдах болсон талаар хурлыг зохион байгуулах Ажлын хэсгээс өнөөдөр мэдээлэл хийлээ.

Энэхүү хурлаар МҮБХ-ны тэргүүнийг солих асуудал яригдана гэдгийг Ажлын хэсгийнхэн өгөв. 

Тэд “Ээлжит бус “Их Эе”-ийг хуралдуулах ажлыг зохион байгуулах албан ёсны Ажлын хэсгийн хэвийн үйл ажиллагааг алдагдуулах зорилгоор МҮБХ-ны нэр барьж Р. Нямдорж тэргүүтэн мэдэгдэл гаргасан тул хариу мэдэгдэл гаргаж байгаа' гэдгээ ийнхүү өнөөдөр олон нийтэд мэдээлж байгаа аж.

“Монгол улсын Дээд шүүхийн Хяналтын шатны Иргэний хэргийн шүүхийн 2003 оны 403 дугаар тогтоолыг МҮБХ хэрэгжүүлээгүй тул нийслэлийн Шийдвэр гүйцэтгэх албанаас 2014 онд МҮБХ-ны Цэцдийн зөвлөлийг албадан хуралдуулж, Ажлын хэсэг томилсон. Цэцдийн зөвлөлөөс томилогдсон Ажлын хэсгээс зохион байгуулж буй Ээлжит бус “Их Эе”-д идэвхтэй оролцохыг бөхчүүд, бөхийн зүтгэлтэн, засуул цэц, аймгийн бөхийн холбоодод уриалж байна” гэж 'Их Эе'-ийг зохион байгуулах Ажлын хэсгийн гишүүд ярилаа. 

Ээлжит бус “Их Эе”-ийг өнгөрөгч 2016 оны арванхоёрдугаар сард хуралдуулах талаар Ажлын хэсэг мэдэгдэж байсан ч хойшлогдсон. Тэгвэл энэ удаагийн хуралд 200 гаруй гишүүд оролцоно гэж Ажлын хэсгийн дарга Ү.Хүрэлбаатар тодотгов.  

Монголын үндэсний бөхийн Ээлжит бус “Их Эе” хуралдах болсонтой холбогдуулан Ажлын хэсгээс гаргасан Мэдэгдлийг бүрэн эхээр хүргэж байна.

МЭДЭГДЭЛ

НЭГ. Нийслэлийн шийдвэр гүйцэтгэх албанаас 2014.06.24-ний өдөр МҮБХ-ны Цэцдийн зөвлөлийг албадан хуралдуулж Монголын үндэсний бөхийн ээлжит бус Их эеийг зохион байгуулан хуралдуулах Ажлын хэсгийг албан ёсоор байгуулсан билээ. Тиймээс ээлжит бус Их Эеийг зарлан хуралдуулах эрх үүрэг бүхий Ажлын хэсэг бүрэн эрхийн хүрээнд шүүхийн гурван шатны шийдвэрийг хэрэгжүүлэх зорилгоор Монголын үндэсний бөхийн ээлжит бус Их Эеийг зарлан хуралдуулж байгааг албан ёсоор мэдэгдэж байна.

ХОЁР. Р.Нямдорж Нийслэлийн шийдвэр гүйцэтгэх албанаас албадан хуралдуулсан Монголын үндэсний бөхийн Цэцдийн зөвлөлийн хурлыг хүчингүй болгуулахаар шалгуулж буй мэтээр мэдэгдэл хийсэн нь бусдыг төөрөгдүүлэх зорилгыг агуулсан төдий зүйл юм. Учир нь Р. Нямдоржийн гомдлыг Сүхбаатар дүүрийн прокурорын газрын 2017.04.10-ны өдөр 387 тоот тогтоолоор хэрэгсэхгүй болгосон бөгөөд энэ тухай Шүүхийн шийдвэр гүйцэтгэх Ерөнхий газраас 2017.05.17-ны өдрийн 08/1783 тоот албан бичгийг ирүүлж шийдвэр гүйцэтгэх ажиллагааг түдгэлзүүлэх шалтгаан арилсан байх тул холбогдох шийдвэр, гүйцэтгэх ажиллагааг сэргээн явуулахыг холбогдох байгууллагад болон Ажлын хэсэгт чиглэл өгсөн болно. Тиймээс Р.Нямдоржийн мэдэгдэл нэгэнт шийдвэрлэгдсэн зүйлийг будилаантуулж, мэдэн будилсан хууль бус оролдлого юм.

ГУРАВ. МҮБХ-ны нэр барьсан Мэдэгдэл гэгчид Ээлжит бус Их Эеийг зохион байгуулах Ажлын хэсгийн дарга Ү.Хүрэлбаатарыг МҮБХ-ны тэргүүлэгчээс хөөгдсөн мэтээр түүний нэр хүндэд халдахыг оролдсон нь Ээлжит бус Их Эеийг будилаантуулж, бусдын анхаарлыг өөр тийш нь чиглүүлэхийг оролдсон ёс зүйгүй бусармаг үйлдэл болсон байна.

ДӨРӨВ. Монголын үндэсний бөхийн ээлжит бус Их Эеэр Монголын үндэсний бөхийн холбооны тэргүүн болон Цэцдийн зөвлөлийг сонгоно. Тиймээс ээлжит бус Их Эед төлөөлөгчөөр сонгогдсон бөхчүүд, бөхийн зүтгэлтэн, засуул цэц, бөх судлаачид, аймгийн бөхийн холбооны төлөөлөгчдийг хуралдаа хүрэлцэх ирэхийг урьж байна. Уг хурлыг тасалдуулах зорилгоор МҮБХ-ны нэр барьж мэдэгдэл хийж буй хууль бус үйлдэлд автахгүй байхыг Ажлын хэсэг уриалж байна.

МОНГОЛЫН ҮНДЭСНИЙ БӨХИЙН ЭЭЛЖИТ БУС

ИХ ЭЕИЙГ ЗОХИОН БАЙГУУЛАХ АЖЛЫН ХЭСЭГ

2017.05. 25