Яахав дэлхий нийтэд хүлээн зөвшөөрөгдсөн гайхалтай уран бүтээлийг үгүйсгэх гэсэн юм биш. Дуу хөгжим гэдэг цаг үеэсээ түрүүлж байж гэмээнэ сонсогчдын сэтгэлд таашаагдаж, хамтлаг дуучдын оршин тогтнох үндэс болж байдаг.

Манайх шиг рок попын акулууд нь шинэ залуу дуучдаа дэмждэггүй улс орон байдаг болов уу. Нэгэнт эзлээд авчихсан байр сууриа алдахгүйн төлөө амь тавин зуурдаг нь жил бүр хийдэг улиг болсон тоглолтуудаас нь харж болно.

Байр сууриа алдахыг хүсээгүй ахмад рок попынхны тухай продюссер Рагу дөрвөн жилийн өмнө өгсөн ярилцлагадаа дэлгэрэнгүй илчилсэн байдаг. Тэрээр “1980-аад онтой адилхан сэтгээд байна. Аль ч улс оронд очиход залуучууд нь их хүчтэй байдаг бол энд урлагийн “хөгшин мафи” нь их хүчтэй байсаар байна. “Миний дууг дуулбал би чамайг дэмжинэ, ивээн тэтгэнэ. Харин миний дууг дуулахгүй бол туслаж чадахгүй” гэсэн сэтгэлгээтэй байдаг юм билээ.

Яг үнэнийг хэлэхэд хөшигний ард байнгын зөрчилтэй байдаг. Хэн нэгэн нь гайгүй зүйл хийвэл “хөгийн юмнууд хачин юм хийсэн байна, чадахгүй байж гээд л” бие биенийхээ талаар хөгийн зүйл ярьдаг”хэмээн ярьжээ. Мөн тэрээр ах нь эгч нь гэж байгаад тоглолтуудад залуусыг үнэгүй дуулуулж хөдөлмөрийг нь шулдаг талаар ч дурдсан юм. 

“Хурд” хамтлаг “Чоно”-ын дүү нараа л бэлтгэж олонд таниулсныг бид мэднэ. Гэхдээ өөрсдийнх нь дүү нар шүү дээ. Харин "Никитон", “Харанга” хамтлаг, дуучин Лхагваагийн залгамж халаа гэж харин сонсоогүй юм байна. Жаравгар Ариунаа шавь бэлтгэх нь бүү хэл, “Universe best songs”-ын оролцогчдыг олигтой шүүж чадаагүйг одоогийн шүүгч Ц.Сарнайтай харьцуулан дүгнэж болох. Харин Б.Сарантуяагийн шавь Л.Насанбуян гэх бүсгүй бий. Масс хамарсан хит дуу гаргахгүй ч Улсын филармонид болсон болоогүй гадаад дуу ч болов гонгинож байгаа харагддаг.

Харин акулууд нэртэй тэдний хажууд дуучин Д.Болд хийсэн юмтай, хойч ирээдүйдээ санаа тавьдаг нь B продакшнаа байгуулж, Э.Энхзол, Б.Маралжингоо, Н.Агиймаа, Т.Эгшиглэн нарын монголчуудын сонсох дуртай олон сайхан авьяастай дуучдыг төрүүлж олонд таниулснаас бэлхнээ харж болно.

Одоо тэрбээр “Channel 11” телевизээ байгуулснаар хүмүүнлэгийн үйлс хийж, хөгжлийн бэрхшээлтэй хүүхэд залуусаас дуу хөгжмийн авьяастайг нь хайж эхэлжээ.  

“Камертон” хамтлагийн хувьд ч хоосонгүй хамтлагаараа нийлж нэг, салж нэг уран бүтээлээ үргэлжлүүлсээр. Тэд өөрсдийн залгамж халаа болох “Бид 4” хамтлагийг төрүүлсэн. Хэдийгээр хамгийн авьяастайд тооцогдсон Б.Оргил энэ хамтлагаас гарсан ч соло уран бүтээл туурвиад тун ч амжилттай яваа билээ.

Эцэст нь акулууд нэртэй "хөгшин мафи" өөрсдөө Д.Болд шиг залуусаа дэмжиж, гарын шавь бэлддэггүй юмаа гэхэд гуядаад нэмэргүй хашин морь шиг шинэ залуу үедээ бүү тээг болоосой.

У.Маргад
Эх сурвалж: Leaders.mn