Энэтхэгийн хамгийн том вэб сайт “Delhi Daily”-д манай улсын талаар нийтлэл тавигджээ. Тэнд өгүүлснээр “Монгол Улсыг Энэтхэг хэрхэвч өөрөөсөө холдуулж болохгүй. Хоёр улс нь эдийн засаг, улс төрийн хувьд харилцаа хамааралтайн дээр Орос, Хятадын дунд оршиж буй зэрэг байдал нь геополитикийн хувьд Энэтхэг улс өргөн хүрээтэйгээр Монголтой харьцах ёстой” гэсэн байв.

Нийтлэлийг бүрэн эхээр нь хүргэе:

Монгол Улс нь Энэтхэгийн жижиг хот Канпуртай хүн амын хувьд адилхан хэдий ч Энэтхэгтэй ойр оршиж буй хамгийн боломжит хамтын ажиллагаатай улс байх магадлал өндөр. Түүгээр ч үл барам түүхий эд, газрын баялгийн асар их нөөцтэй энэ улсад АНУ тэргүүтэй дэлхийн тэргүүлэх гүрнүүд аль хэдийн хөрөнгө оруулах тавцанд өрсөлдөөн үүсгээд эхэлсэн. Үүний завсар Хятад ч энэ баялгаас тэгш хүртэх сонирхолтой байгаа учир Энэтхэг улс аль хэдийн тэрхүү өрсөлдөөнд нэгдэж, Монголоос харилцаагаа таслахаас ямагт зайлсхийх хэрэгтэй.

Энэтхэг улс Монголд 2017-2018 оны үед санхүүгийн хэд, хэдэн дэмжлэг, туслалцаа үзүүлэхээр тохиролцсон бөгөөд энэ нь цаашдын хоёр улсын нөхөрлөлийн үүд хаалгыг нээх эхний алхам.

Энэтхэг улс БНХАУ-тай хэд, хэдэн шалтгаанаар улс төрийн тийм ч дотно бус хөршүүд. Гэвч Энэтхэгийн зах зээл, эдийн засгийн нэлээд том байр суурийг БНХАУ дангаараа бүрдүүлдэг. Тийм ч учраас Энэтхэг, Хятадаас шууд нүүр буруулж болохгүй. Хамгийн гол нь Монголтой хэт ойртвол Хятадтай таагүй харилцаа үүснэ. Энэ асуудалд нэлээд болгоомжтой хандан, Монгол Улстай харилцаагаа эвтэйхэн байдлаар бэхжүүлж, “гурав дахь хөрш” гэх алдрыг зүүх шаардлагатай юм.

Монголын эдийн засаг хамгийн түргэн хугацаанд уналтад орж, хэдэн зуун тэрбум ам.долларын алдагдал хүлээхийн сацуу, түүхий эдийн үнэ дэлхийн зах зээлд унаснаар экспортын гол нэрийн бүтээгдэхүүнээ үнэгүйдүүлэх зэрэг эрсдэлд ороод байна. Тиймдээ ч хөрш орнууд нь Монгол Улсын бодлогогүй гадаад улс төрийн шийдвэрийг өдгөө тохуурхан, гадуурхах хандлагатай болжээ.

Энэтхэгийн Ерөнхий сайд Нарендра Моди 2015 онд Монголд айлчлахдаа хоёр улсын харилцааг анх удаа илүү ойр түвшинд авч ирэх алхам болсон. Монгол Улсыг дэлхий дахинд тусгаар тогтносон гэдгийг НҮБ зарласны дараа Энэтхэг хамгийн түрүүнд хүлээн зөвшөөрсөн нь хоёр орны харилцаа эртнээс тийм ч муу байгаагүйг харуулах болно.

Улаанбаатарт өгөхөөр амласан 1 тэрбум ам.долларын зээлийг Энэтхэг улс ойрын хугацаанд шийдэж өгч, үүний хүрээнд хэд хэдэн төсөлд хамтран ажиллавал Монголд хэцүү үед нь тусалсан том алхам байх юм. Гэхдээ хэт их зөөлөн нөхцөлтэй байхаар заасан тус гэрээг нэн даруй засч залруулж, эрсдэлээ тооцох хэрэгтэй.