Архангай аймгийн Цэнхэр сумын Орхон багт 1999 оноос хойш алт олборлох үйл ажиллагаа явуулж байсан ашигт малтмалын тусгай зөвшөөрөл эзэмшигч 11 аж ахуй нэгжийн ашиглалтын 12, хайгуулын 1 тусгай зөвшөөрлийг 2019 оны 8 дугаар сарын 21-ний өдөр “Ашигт малтмалын тухай” хуулийн 56-р зүйлийн 56.1.5 дах хэсэгт заасны дагуу аймгийн Засаг даргын санал, Байгаль орчин, аялал жуулчлалын яамны ажлын багийн дүгнэлтийг үндэслэн Ашигт малтмал, газрын тосны газрын Кадастрын хэлтсийн даргын шийдвэрээр цуцалж, алт олборлох үйл ажиллагааг зогсоон, эвдэрсэн газарт нөхөн сэргээлт хийх ажлыг эхлүүлсэн. Ашигт малтмалын тусгай зөвшөөрлөө цуцлуулсан 11 аж ахуйн нэгж дээрх шийдвэрийг эсэргүүцэн шүүхийн байгууллагад гомдол гаргаж, 2022 оны байдлаар Цэнхэр сумын Орхон багийн Гүүтийн ам гэх газарт “Сэншивэе Монгол” ХХК-ийн MV-017316 дугаартай ашиглалтын тусгай зөвшөөрөл, Шийрт, Харгуйтын ам гэх газарт “Батдөлгөөн мөрөн” ХХК-ийн MV-005529 дугаартай ашиглалтын тусгай зөвшөөрөл, Өлийн голын адаг гэх газарт “Гурван хайрханы асар” ХХК-ийн MV-004174 дугаартай ашиглалтын тусгай зөвшөөрөл, Өлзийт тээл гэх газарт “БМНС” ХХК-ийн MV-001410 дугаартай ашиглалтын тусгай зөвшөөрөл, Бодонт гэх газарт “Голден хаммер” ХХК-ийн MV-004780 дугаартай ашиглалтын тусгай зөвшөөрөл, Өлийн гол гэх газарт “Улз групп” ХХК-ийн MV-020442 дугаартай ашиглалтын тусгай зөвшөөрөл, Ар чулуутын ам гэх газарт “Алтай голд” ХХК-ийн MV-012470 дугаартай ашиглалтын тусгай зөвшөөрөл, Өлзийт тээл гэх газарт “Эрдэнэсийн хотхон” ХХК-ийн XV-006219 дугаартай хайгуулын тусгай зөвшөөрлүүдийг гурван шатны шүүхийн шийдвэрийг үндэслэн Ашигт малтмал, газрын тосны газрын Кадастрын хэлтсийн даргын шийдвэрээр сэргээсэн байна. Ашигт малтмалын тусгай зөвшөөрлүүдийг сэргээсэнтэй холбоотойгоор 2021 онд аймгийн Засаг даргын 2021 оны А/104 дугаартай “Ажлын хэсэг байгуулах тухай” захирамжаар холбогдох төрийн байгууллагуудыг хамруулсан ажлын багийг байгуулан Цэнхэр сумын Орхон багт ашигт малтмалын тусгай зөвшөөрөлтэй болон тусгай зөвшөөрөл цуцлагдсан талбайд байнгын хяналт тавих, хэв журмыг сахиулах, хууль тогтоомжийн хэрэгжилтийг хангуулах хяналтын постыг дээрх байгууллагуудын 4-5 албан хаагчийн бүрэлдэхүүнтэйгээр 3 дугаар сарын 1-нээс 11 дүгээр сарын 1-нийг хүртэлх хугацаанд, 2022 онд аймгийн Засаг даргын 7 дугаар сарын 8-ны өдрийн А/536 дугаар захирамжаар ажлын баг байгуулан Цэнхэр сумын Орхон багт хууль бусаар ашигт малтмал олборлох эрсдэлээс урьдчилан сэргийлэх хяналтын постыг аймгийн Цагдаагийн газар, Байгаль орчин, аялал жуулчлалын газар, Орхон-Чулуут голын сав газрын захиргаа, Цэнхэр сумын Засаг даргын тамгын газартай хамтран 7 дугаар сарын 25-ны өдрөөс 11 дүгээр сарын 13-ны өдрийг хүртэлх хугацаанд тогтмол хяналт шалгалтыг хийж гүйцэтгэсэн байна. 2021 онд ашигт малтмал ашиглалтын MV-001410 дугаартай тусгай зөвшөөрлийг эзэмшигч “БМНС” ХХК нь Өлзийт тээл гэх газарт Ашигт малтмалын тухай хууль болон бусад холбогдох хууль тогтоомжид шаардагдах уурхайд байх баримт бичгийг батлуулан 2 га талбайд хөрс хуулалт, олборлолтын ажил, 15 га талбайд техникийн нөхөн сэргээлт, 25 га талбайд биологийн нөхөн сэргээлтийн ажлыг хууль журмын хүрээнд хийж гүйцэтгэсэн. Бусад аж ахуй нэгжийн уул уурхайн олборлолтын ажлыг эхлүүлээгүй байна. 2022 онд ашигт малтмал ашиглалтын MV-001410 дугаартай тусгай зөвшөөрлийг эзэмшигч “БМНС” ХХК, MV-004780 дугаартай ашиглалтын тусгай зөвшөөрөл эзэмшигч “Голден хаммер” ХХК, MV-004780 дугаартай ашиглалтын тусгай зөвшөөрөл эзэмшигч “Улз групп” ХХК-ууд Ашигт малтмалын тухай хууль болон бусад холбогдох хууль тогтоомжид шаардагдах уурхайд байх баримт бичгийг батлуулсан боловч “Голден хаммер” ХХК, “Улз групп” ХХК-ийн бичиг баримт олборлолт хийх боломжит хугацаа буюу 4 дүгээр сараас 10 дугаар сарын хугацаанд багтаж батлагдаагүй тул үйл ажиллаагаа явуулаагүй аж. Мөн 2022 онд “БМНС” ХХК 4.7 га талбайд хөрс хуулалт, олборлолтын ажил, 10 га талбайд техникийн, 8 га талбайд биологийн нөхөн сэргээлт (3101.2 сая), “Гурван хайрханы асар” ХХК 6 га талбайд техникийн нөхөн сэргээлт (240 сая), “Батдөлгөөн мөрөн” ХХК 8 га талбайд техникийн нөхөн (135 сая ) сэргээлтийг тус, тус хийж гүйцэтгээд байна. Өнөөдрийн байдлаар Цэнхэр сумын Орхон багт нөхөн сэргээлт хийх шаардлагатай уул уурхайн олборлолтын улмаас эвдэрсэн 12 байршлын 480.65 га талбай байгааг мэргэжлийн байгууллагаас мэдээллээ. Цаашид Цэнхэр сумын Орхон багт тусгай зөвшөөрөл эзэмшигчдээр нөхөн сэргээлтийг бүрэн хийж гүйцэтгүүлэх, ордуудын нөөцийг бүрэн ашиглуулж, цаашид дахин уул уурхайн олборлолт явуулах нөхцөлөөс урьдчилан сэргийлэх Байгаль орчин, аялал жуулчлалын яам болон Уул уурхай, хүнд үйлдвэрийн яамны бодлого шийдвэрийг нэгтгэж, уул уурхайн ашиглалт эхлүүлэх боломжит хугацаа буюу 3 дугаар сараас өмнө аж ахуй нэгжүүдийн бичиг баримтыг бүрдлийг хангуулж, хуулийн дагуу олборлолтын үйл ажиллагааг эхлүүлэх ажлыг зохион байгуулах шаардлагатай байгааг аймгийн БОАЖГ-аас мэдээлэв.

БУСАД

ҮХ-ИЙН ӨӨРЧЛӨЛТ & Г.ЗАНДАНШАТАР ...

БОАЖЯ: 3050 гэр хорооллын 00-ыг ...

Улсын хэмжээнд 10 мянга гаруй ...

ХӨРӨНГИЙН АРИЛЖАА — 2023-25 ОНЫ ...

СЭТГЭГДЭЛ БИЧИХ

ШИНЭ МЭДЭЭ