Хөрвүүлж, боловсруулсан О.Анар

2021 оны нэгдүгээр сарын 27.

НҮБ-ын Худалдаа, хөгжлийн бага хурлын илтгэлд дурьдсанаар, Энэтхэг улсад оруулах гадны хөрөнгө оруулалтын хувь хэмжээ нэмэгдсэн байна.

2014 онд Нарендра Моди Энэтхэгийн Ерөнхий сайдаар томилогдож, Засгийн эрхэнд гарах үед тус улсад оруулах гадаадын аж ахуйн нэгж, пүүс компаниудын хөрөнгө оруулалт 25 тэрбум америк доллар хүрэхгүй байсан бол өнгөрөгч 2020 онд 57 тэрбум америк доллар болтлоо өсчээ. Энэ бол засаглалын маш сайн жишээ болж байгаа юм.

Гадны хөрөнгө оруулалт тэлснээр «IKEA», «UNIQLO» зэрэг үндэстэн дамнасан томоохон корпорацуудын салбарууд Энэтхэгт өөрсдийн дэлгүүрээ нээх боломжийг олгосон шинэ бодлогуудаас гадна Нарендра Модигийн санаачилсан «Made in India» кампанит ажил зэрэг нь улс орны үйлдвэрлэлийн баазыг бэхжүүлэхэд түлхэц болж өгсөн.

Нөгөөтэйгүүр, өнгөрөгч 2020 онд Дэлхийн улс орон болгон эдийн засгийн хувьд “азтай” байгаагүйг шинжээчид дүгнэсэн. Тухайлбал, Их Британи, Итали дахь гадаадын шууд хөрөнгө оруулалтын хэмжээ бараг 100 хувиар, ОХУ-д 96 хувиар, харин Германы хувьд 61 хувиар буурсан аж.

2019 онд гадаадын хөрөнгө оруулагчдын жагсаалтаараа тэргүүлж байсан Австрали, Франц, Канад, Индонези гэх улс орнууд хүртэл үзүүлэлт нь хоёр оронтой тоогоор буурсан байна.

Дэлхийн хэмжээнд гадаадын шууд хөрөнгө оруулалт 42 хувиар буурсан нь 1990-ээд оноос хойшхи хамгийн доод түвшин буюу 2008 оны санхүүгийн хямралын дараах дүнгээс ч доогуур үзүүлэлт юм.

«Си-Эн-Эн» (CNN) агентлагийн мэдээлснээр, АНУ-ын хувьд хөрөнгө оруулагчдын сонирхлыг татаж байсан гол хүчин зүйл нь юуны өмнө эдийн засгийн тогтвортой, аюулгүй хөрөнгө оруулалтын чиглэл болж байсан нь олон жилийн турш Америкийн эдийн засгийн өсөлтийг өдөөсөн хүчирхэг хүчний нэг байсан юм. Гэсэн хэдий ч, НҮБ-ын Худалдаа, хөгжлийн бага хурлын шинжээчдийн үзэж байгаагаар, АНУ дахь гадаадын хөрөнгө оруулагчдад тавьж буй нөхцөл шаардлага 2021 онд ч өөрчлөгдөхгүй аж.

“Коронавирусын цар тахлын хөрөнгө оруулалтад үзүүлэх хор нөлөө одоо хэр нь мэдрэгдэх болно. Хөрөнгө оруулагчид гадаадын шинэ үйлдвэрлэлийн хөрөнгө оруулалт хийхдээ болгоомжтой хандах байх” – хэмээн НҮБ-ын Худалдаа, хөгжлийн салбарын хөрөнгө оруулалт хариуцсан захирал Жеймс Чан илтгэлдээ дурьджээ.