Хөрвүүлж, боловсруулсан О.Анар

2021 оны нэгдүгээр сарын 27.

ВАШИНГТОН.

ОХУ-ын Ерөнхийлөгч Владимир Путин АНУ-ын Цагаан ордны шинэ тэргүүн Жо Байденыг Ерөнхийлөгчийн тангараг өргөснийх нь дараа түүнтэй утсаар ярилцсан байна. Тэд ОХУ, АНУ-ын хооронд байгуулсан Стратегийн давшилтын зэвсэглэлийг хориглох тухай гэрээ (СНВ-III)-г дахин сунгахаар харилцан тохиролцлоо. Энэ талаар «Нью Йорк Таймс» (New York Times) сонинд нийтэлжээ. Тус гэрээний хугацаа ирэх хоёрдугаар сарын 5-нд дуусах бөгөөд цөмийн зэвсгийг хязгаарлах тухай хоёр улсын хооронд үлдсэн цорын ганц гэрээ гэдгээрээ онцлогтой.

Ойрын өдрүүдэд талууд гэрээтэй холбоотой техникийн бүх л асуудлыг шийдвэрлэхээр мөн тохиролцсон байна.

Гэсэн хэдий ч, бусад хэд хэдэн асуудлаар Жо Байден өмнөхөөсөө илүү хатуу байр суурь баримтлах болно гэдгээ Путин Ерөнхийлөгчид илэрхийлсэн гэж эх сурвалж мэдээлэв. Ерөнхийлөгч Жо Байден Алексей Навальныйг хордуулсан хэргийн талаар, мөн АНУ-ын Засгийн газарт халдсан кибер халдлагын асуудлыг хөндсөн байна. Түүнчлэн, ОХУ Афганистан дахь Америк цэргүүдийн “толгойд” шагнал урамшуулал зарласан гэх батлагдаагүй мэдээллийн талаар, Оросын тал өнгөрөгч 2020 оны АНУ-ын бүх нийтийн сонгуулийн үйл явцад “хөндлөнгөөс оролцсон” гэх зэрэг сэдвүүдийг сөхсөн байна.

Цагаан ордон энэ мэт сэдвүүдийг хөндсөн нь АНУ-ын шинэ Ерөнхийлөгч үндэсний ашиг сонирхлыг хамгаалахын тулд цаашид хатуу байр сууринаас, тууштай ажиллах болно гэдгээ Оросын талд “ойлгуулсан” хэрэг болж байгаа юм. Нөгөөтэйгүүр, хоёр орны Төрийн тэргүүнүүд илүү ил тод, илүү тунгалаг, системтэй харилцаа холбоог нягт хадгалахаа харилцан тохиролцлоо.

Кремлийн зүгээс ч гэсэн удирдагчид Стратегийн давшилтын зэвсэглэлийг хориглох тухай гэрээ (СНВ-III)-ний хугацааг сунгахаар тохиролцсон гэдгийг баталгаажууллаа. ОХУ, АНУ-ын удирдагч нарын утсаар хийсэн яриа нэлээд “ажил хэрэгч, илэн далангүй” болсныг онцолж байна.

Эх сурвалжийн мэдээлснээр, Ерөнхийлөгчийн албанд дөнгөж томилогдсон Жо Байдены удирдлага дор АНУ-ын Засаг захиргаа илүү мэргэжлийн түвшинд ажиллана гэдэгт найдаж байгаагаа Москва илэрхийлсэн байна. Тиймээс Ерөнхийлөгч Путин хоёр орны харилцааг хэвийн болгох нь аль алиных нь ашиг сонирхолд нийцэхээс гадна Дэлхий дахины аюулгүй байдал, тогтвортой байдлын онцгой үүрэг хариуцлагыг харгалзан, цаашлаад Олон улсын хамтын нийгэмлэгийн ашиг сонирхолд ч хувь нэмэр оруулах гол эх үүсвэр болно гэдгийг онцоллоо.