Хөрвүүлж, боловсруулсан О.Анар

2021 оны нэгдүгээр сарын 26.

ВАШИНГТОН.

АНУ-ын Тэргүүн хатагтай асан Меланья Трамп америкийн улс төрийн 70 жилийн түүхэн уламжлалыг анх удаагаа зөрчсөн үйлдэл гаргасан байна. Тэрээр АНУ-ын 46 дахь Ерөнхийлөгчөөр сонгогдсон Жо Байдены эхнэр Жилл Байден буюу шинэхэн Тэргүүн хатагтайг хүндэтгэн хүлээн авч, Цагаан ордныг нэг бүрчлэн танилцуулахаас татгалзжээ.

«Си-Эн-Эн» (CNN) мэдээллийн агентлагийн мэдээлснээр, өмнөх Тэргүүн хатагтай бол шинэ Ерөнхийлөгчийн тангараг өргөх ёслолоос өмнө гэр бүлийнхэнд зориулсан жигүүрт шинэ Тэргүүн хатагтайг найрсгаар урьж, Цагаан ордон доторхийг танилцуулж, Цагаан ордон дахь ахуй амьдралын талаархи яриа өрнүүлдэг уламжлалыг дагах ёстой байдаг аж.

Одоогоос таван жилийн өмнө 2016 онд Дональд Трампыг АНУ-ын Ерөнхийлөгчөөр сонгогдоход Тэргүүн хатагтай асан Мишель Обама нь Меланья Трампад дээрхи уламжлалын дагуу түүнийг урьж, Цагаан ордныг найрсгаар танилцуулж байсан юм. Гэтэл, энэ удаад шинэхэн Тэргүүн хатагтай Жилл Байден нь Меланья Трампаас найрсаг урилга хүлээн авсангүй.

Ардчилсан намаас нэр дэвшин өрсөлдсөн Жо Байден нь АНУ-ын Ерөнхийлөгчийн сонгуульд үнэмлэхүй ялалт байгуулж, энэ сарын 20-нд Ерөнхийлөгчийн тангарагаа өргөж, АНУ-ын 46 дахь Ерөнхийлөгч болоод байгаа билээ. Ерөнхийлөгчийн тангараг өргөх ёслолд өмнөх Ерөнхийлөгч Дональд Трамп оролцохгүй гэдгээ албан ёсоор мэдэгдсэн.

Дональд Трампыг дэмжигчид, фанатууд 2020 оны 12 дугаар сарын 6-нд Америкийн Капитолд Сенат болон Конгрессын хамтарсан хуралдаан болох үеэр Конгрессын барилга руу дайран орж, үймээн самуун дэгдээсэн үйл явдал болсон. Үймээн самууны үр дүнд дөрвөн ч хүн амиа алдсан эмгэнэлт хэрэг гарсан юм. Энэ үйл явдлаас өмнөхөн нь нийслэл Вашингтон хотод Ерөнхийлөгч асан Дональд Трампын талыг баримтлагчид, өөрийг нь дэмжигчидтэй тусгайлан уулзалт зохион байгуулж, Капитол руу очиж, Конгрессын гишүүдэд 2020 оны Ерөнхийлөгчийн сонгууль шударга болоогүй, сонгуулийн саналыг хууль бусаар «луйвардсан» гэдгийг хэлэх хэрэгтэй гэж уриалсан байсан.

Нийслэл Вашингтон дахь Капитол руу дайран орж үймээн самуун дэгдээсэн үйл явдлын талаар Тэргүүн хатагтай асан Меланья Трамп өөрийн үзэл бодлоо илэрхийлэв. Ийм зүйл болсон нь түүнийг үнэхээр цочролд оруулсан гэдгийг тодотгоод, америкчуудад үзэн ядалтаа, харгис хэрцгий явдлаа даруй зогсоохыг уриалсан байна.