Өчигдөр буюу нэгдүгээр сарын 21-ний өдөр “Бавгар” ХХК-ийн захирал Х.Оюун хэвлэлийн хурал хийж, Цагдаагийн хурандаа нар их хэмжээний авлига нэхэж, дарамталсан тухай мэдээлсэн билээ. 
 

Х.Оюун хэлэхдээ “Бавгар” ХХК нь 2015 оны есдүгээр сарын 4-ний өдөр ЦЕГ-ын алба хаагчид, хууль сахиулагчдын хотхоныг барьж байгуулах ажлын гэрээнд гарын үсэг зурсан. Тус байр нь А, Б, В, Г дөрвөн блок 376 айлын хотхон бөгөөд барилгад нийгмийн эмзэг бүлэг буюу төрийн албанд ажилладаг өрх толгойлсон эмэгтэй, ажил албаа гүйцэтгэж яваад амь насаа алдсан хүмүүсийн ар гэрт туслах зорилгоор квот тарааж өгсөн байсан юм. ЦЕГ-ын ажлын хэсгийн дарга Б.Цогтбаяр гэх хүн барилгын ажилд хяналт тавьж, надтай хамтарч ажиллаж байсан ч яваандаа өөр зүйл ярьж эхэлсэн. Тэр хүн ашиглалтад орсон байгаа пентхаусаас хоёрыг зүгээр өгчих. Ашиглалтад ороогүй байгаа В блокоос 30 ширхэг байр үнэгүй өг гэж дарамталсан. Дараа нь “Миний хүссэнийг өгөхгүй бол танай компанийг солино. Чи өрөө төлж чадахгүй шоронд явна, миний үгээр байхгүй бол явуулна” гэдэг болсон. Би худлаа мэдээлэл өгч байгаа бол хариуцлагаа 100 хувь хүлээнэ. Гэрээний дагуу мөнгөө өгсөн бол энэ төсөл хоёр жилийн өмнө дуусах ёстой байсан. Би болон миний ээж хурандаа нарт ямар ч өргүй гэдгийг хэлье” гэсэн юм.

Түүнчлэн ЦЕГ-т гэмт хэргийн шинж чанартай хурандаа нарын үйлдлүүдийг баримтын хамтаар хүргүүлсэн ч албаныхан хурандаа нараа хамгаалсан, өмгөөлсөн утгатай хариу ирүүлж байгаа гэх мэдээллийг өгсөн юм. 

Тэгвэл энэ асуудлаар өнөөдөр /2020.01.22/ Цагдаагийн ерөнхий газраас тайлбар өглөө.

ЦЕГ-ЫН ДЭД ДАРГА, ЦАГДААГИЙН ХУРАНДАА Ж.БОЛД

-Цагдаагийн алба хаагчтай холбоотой мэдээлэл гарсны дагуу Ажлын хэсэг байгуулагдан ажиллаж байна. 2015 оноос цагдаагийн алба хаагчдын нийгмийн асуудлыг шийдэх үүднээс "Бавгар" ХХК-тай цагдаагийн алба хаагчид гэрээ байгуулж, орон сууц бариулах ажлыг эхлүүлсэн. Өнөөдрийн байдлаар 1 дүгээр корпус ашиглалтад орсон байгаа. Хоёр корпус барилгын суурийн ажил дуусах шатандаа үргэлжилж байгаа юм. 

Иргэний мэдээлэл, хэвлэлд гарсан мэдээлэлтэй холбогдуулан Цагдаа, дотоодын цэргийн нэгдсэн сургалтын төвийн дарга, хурандаа Б.Цогтбаярыг ажлаас чөлөөлж, сахилга ёсзүй гэмт хэргийн шинжтэй үйлдэл байгаа эсэхийг шалгахаар ажиллаж эхэллээ.

Хэвлэл мэдээллээр өгсөн мэдээллийг нягтлан шалгаж байна. Өмнө нь цагдаагийн байгууллагад хоёр удаа өргөдөл, гомдол өгч байсан гэж хэлсэн.

Өнгөрсөн 2018 онд “Бавгар” компанийн зүгээс “Цагдаагийн алба хаагчид мөнгөө өгөөгүй байна” гэдэг асуудлаар хандаж байсан. Тухайн үед ажлын хэсэг гарган шалгаж, хотхоны захиалагч талын ажлын хэсгийн өмнөх ахлагчийг сольж Б.Цогтбаярыг энэхүү албан тушаалд томилж байсан юм. Энэ асуудалтай холбоотой өргөдөл, гомдол ЦЕГ-т өмнө нь ирүүлж байгаагүй гэж ойлгож байна. Хэвлэл мэдээллээр яригдсан, нэр дурдагдсан цагдаагийн хурандаа нарыг шалгаж, тогтооно. Б.Цогтбаяр хурандааг ажлаас нь чөлөөлснөөр Авлигатай тэмцэх газарт шалгаж эхэлсэн байгаа.