УИХ-ын дарга асан М.Энхболдыг огцруулах буюу У.Хүрэлсүхийн захиалсан Л.Оюун-Эрдэнэ нарын удирдсан “МАНАН бүлэглэлийн эсрэг Монгол түмний жагсаал”-ын үеэр нэгэн хүн М.Энхболдыг хутгалахаар дайрсан талаар түүний зөвлөх асан, хуульч Б.Гүнбилэг “Ам нээвэл” нэвтрүүлэгт оролцохдоо ярьжээ.

Тэрбээр, “УИХ-ын нэр бүхий таван гишүүний хамт “Босоо хөх Монгол” гэх мэт цөөнгүй бүлгэмийн төлөөлөл Төрийн ордонд орж, М.Энхболдтой уулзсан. Та нар ард түмнийг турхирч байна, ингэж болохгүй гэж би таван гишүүнд орохоос нь өмнө хэлсэн.Гэтэл хөдөлгөөнүүдийн төлөөллийн нэг нь УИХ-ын даргын өрөөнд М.Энхболдыг хутгалахаар дайрсан. Монгол Улсын түүхэнд байгаагүй үйлдэл. Хамгаалагчид өнөөх хүнийг бүчээд, дараад унагаасан. Тэр асуудал ил болоогүй, чимээгүй өнгөрсөн. Төрийн ордны гадна жагсаж байсан иргэд маш их бухимдалтай байсан. Хэрвээ тэр иргэнийг баривчилсан, аваад үлдсэн бол Сүхбаатарын талбайд жагсаж байсан иргэд үймээн дэгдээх эрсдэлтэй байсан. Тэр хүнийг ордноос гаргаагүй бол Долдугаар сарын 1 болж мэдэхээр байсан” хэмээсэн юм.

Тэрбээр ийм л үнэн, худал нь мэдэгдэхгүй. Эсвэл муу нэртийг өрөвдүүлэх гэсэн арга ч байж болох хачирхалтай, баримтгүй мэдээлэл түгээлээ.

Уг нь манай төрийн ордон бол АНУ-ын “цагаан ордон”, Английн хатан хааны өргөөтэй дүүхүйц чанд, сүржин хамгаалалттай гэж хэлж болно. Тодруулбал, Төрийн тусгай хамгаалалтын газар гэж бүхэл бүтэн цэргийн анги шиг хүний нөөцтэй байгууллага Монголын “саарал” ордонг хамгаалдаг. Ингэхдээ тэд бүхий л орчин үеийн хэрэгсэл, сканер, металл илрүүлэгч, үнэрч нохой зэргийг ашигладаг. Бараг тэдний сүржин хамгаалалтыг давахын тулд жирийн иргэн өмдний тэлээгээ тайлах шах уу юм болдог. Тиймээс тийшээ "хутгатай" хүн байтугай хумс нь уртхан хүн ч зүглээд бараг барахгүй гэж хэлж болно.

Тэгвэл жирийн бус жагсаал цуглаантай, харуул хамгаалалт өндрөө авсан тэр үед яагаад төрийн ордонд, тэр байтугай УИХ-ын дарга асан М.Энхболдын өрөөнд хутгатай хүн нэвтрэв ээ.

Энэ бүхнээс үзэхэд М.Энхболдын зөвлөх худал ярьсан, эсвэл төрийн ордон руу хэн нэгний, магадгүй тухайн үеийн жагсаал цуглааныг удирдан зохион байгуулагчийн захиалгаар Төрийн Тусгай хамгаалалтын газрын оролцоотойгоор хутагтай хүн нэвтрүүлсэн үү? гэдэг асуудал бос ч ирж байгаа юм.

А.ТАМИР

АРДЧИЛАЛ.МН