Монгол Улсын Үндсэн хуулийн нэмэлт, өөрчлөлтийн эхийг баталгаажуулах ёслол Төрийн есөн хөлт цагаан тугт өргөөнд эхэллээ. Төрийн ёслол хүндэтгэлийн энэ арга хэмжээнд Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх болон УИХ-ын гишүүд оролцов.

Ерөнхийлөгч Х.Баттулга Үндсэн хуульд оруулсан нэмэлт, өөрчлөлтийн уг эхэд гарын үсэг зурж, нотлон баталгаажуулсны дараа үг хэллээ.

Монголчууд аа,
УИХ-ын эрхэм гишүүд ээ
УИХ-ын дарга аа
Ерөнхий сайд аа,
Анхдугаар Үндсэн хуулийн 95 жилийн ойн энэ өдөр Монгол Улсын Үндсэн хуульд оруулсан нэмэлт, өөрчлөлтийг нотлон баталгаажууллаа. 1992 оны Ардчилсан шинэ Үндсэн хуулийг орчин цагийн шаардлага, нийгмийн хэрэгцээнд нийцүүлэн өөрчлөх асуудлыг Монголын олон нийт, улс төрийн хүрээнд сүүлийн 11 жилийн турш идэвхтэй хэлэлцэж, УИХ-ын гишүүдийн зүгээс төслийн 4 удаа өргөн барьжээ.

Миний бие УИХ-ын 2018 оны намрын чуулганы нээлтэн дээр Үндсэн хуульд нэмэлт, өөрчлөлт оруулах замаар засаглалын тогтолцооны зохист хэлбэрийг сонгох болон улс төр, нийгмийн хуримтлагдсан асуудлыг нэг мөр шийдэх эрс өөрчлөлт хийхийг парламентийн гишүүдэд уриалсан билээ. Өнгөрсөн хаврын чуулганаар УИХ Үндсэн хуульд нэмэлт, өөрчлөлт оруулж нийгмийн захиалгыг хагас боловч биелүүлээд байгааг бид чамлах хэрэггүй байх. Энэ удаагийн УИХ эрс өөрчлөлт хийж чадаагүй ч урагш бас хагас алхлаа.

Уг нь нэг мөр шийдэх олон асуудал байсан боловч олигарх, цөөнхийн эрхшээлд багтсан бүлэглэлүүдийн явуулгаар бүтэн урагш алхаж чадсангүй ээ. Бид мөн сонгуулийн тогтолцоогоо оновчтой болгож чадсангүй. Жалга довны төлөөлөл хэвээр байх үзэл санаа нь амь бөхтэй зуурч үлдсэн. Гэхдээ л чамлахаар чанга атгах цаг иржээ. Үгүй бол бид дахиад найман жил хүлээхэд хүрнэ.

Улс орны хөгжил тэр хугацаагаар саарч, нийгмийн зохицуулалт, цаг үеийн шаардлагаас хоцрог сугарч үлдэх болно. Төр улс орныг удирдах зохицуулах чадвараа бүрэн алдах, энэ нь эрсдэлийг дагуулах уршигтай байх нөхцөл бүрджээ. Учир иймд улс орны эрх ашгийг эн тэргүүнд эрхэмлэх, үндэсний эв нэгдлийг бүхнээс дээгүүр эрэмбэлэх зарчмын үүднээс Үндсэн хуулийн нэмэлт, өөрчлөлтийг соёрхон батлах, ёсчлох нь зүйтэй гэж үзлээ. Бүхний түрүүнд Монголын эрх ашиг, ард түмний ирээдүйн сайн сайхан эрэмбэлэгдэх учиртай хэн ч, хэрхэвч мартаж болохгүй.

Монголчууд бид сөргөлдөх бус эвлэлдэх, хойшоо чангаах биш урагш тэмүүлэх, цаг ирсэн тул ийнхүү Үндсэн хуульд оруулсан нэмэлт, өөрчлөлтийг нотлон баталгаажуулж байна. Иргэн  бүр УНШТУГАЙ, УХААРТУГАЙ, ДАГАТУГАЙ!

Мөнх тэнгэрийн хүчин дор Монгол даяар хуульт ёс тэгш үйлчилж, зон олон шударга төрийн далбаан дор энх тунх жаргах болтугай!