УИХ-ын дарга Г.Занданшатар удаан хугацаанд шахалт үзүүлсний үр дүнд Монгол банкны Ерөнхийлөгч Н.Баяртсайхан, Санхүүгийн Зохицуулах Хорооны дарга С.Даваасүрэн нарыг өчигдөр үүрэгт ажлаас нь өөрсдийнх нь хүсэлтээр чөлөөлсөн билээ. Ингэхдээ тэднийг манай улс “ФАФТ-ийн “саарал” жагсаалтад орсон асуудалтай холбогдуулж, хариуцлага тооцож байгаа нэрээр ажлаас нь чөлөөлсөн юм . Тэгвэл тэднийг орлох хүмүүсийг бас л УИХ-ын дарга Г.Занданшатар санал болгосноор өнөөдөр УИХ томиллоо. 

Энэ талаарУИХ-ын хэвлэл, мэдээллийн хэлтсийн дарга С.Батбаатар “УИХ-ын дарга Г.Занданшатар Монгол банкны ерөнхийлөгчид Б.Лхагвасүрэнг, Санхүүгийн зохицуулах хорооны даргад Д.Баярсайханыг нэр дэвшүүллээ. Төрийн албаны шатлан дэвшүүлэх зарчмыг баримталж, мэргэжлийн, чадварлаг хүмүүсийг сонгосон гэж үзэж болох нь. Томилгоо бүхэн ийм, шударга, улс төрөөс хараат бус байвал төрийн алба чадавхтай болно” хэмээн мэдээлжээ.

Тэгвэл УИХ-ын дарга Г.Занданшатарын санал болгож, томилуулж чадсан Б.Лхагвасүрэн Д.Баярсайхан нарыг Монгол банк, СЗХ-ны удирдлагаар томилсон томилгоо хэр үндэслэлтэй, үр дүнтэй зөв томилгоо вэ гэдэг нь өөрөө асуудал дагуулж байна. Учир нь УИХ-аас Монгол банк, СЗХ-ны удирдлагуудад хариуцлага тооцсон боловч, тус байгууллагуудын дэд дарга нарт албан тушаалын шагнал хүртээсэн нь сонирхол татаж эхэллээ

Уг нь УИХ-аас, дарга Г.Занданшатарын үзэж байгаар Монголыг “саарал” жагсаалтад оруулахад Монгол банк, СЗХ буруутай аж. Тэр ч утгаараа удирдлагуудыг нь маш хурдан явуулчихлаа. Гэтэл яагаад хариуцлага тооцсон байгууллагуудынхаа удирдлагуудад УИХ, УИХ-ын дарга алагчилж хандав.

Хэрэв Монгол банкны Ерөнхийлөгч Н.Баяртсайхан хариуцлага хүлээж ажлаа өгч байгаа бол мөн адил дэд Ерөнхийлөгч Б.Лхагвасүрэн ажлаа өгч адилхан хариуцлагаа үүрэх л ёстой. Түүний адил СЗХ-ны дэд дарга Д.Баярсайхан ч хариуцлага үүрэх ёстой сон. Гэтэл тэгсэнгүй. Харин ч эсрэгээрээ том даргын суудалд дэд дарга нар нь тухлав.

Үнэхээр “хачирхалтай”, но-той томилгоо боллоо. Бодвол мөнөөх “шударга” дүрт Ерөнхий сайд У.Хүрэлсүх, УИХ-ын дарга Г.Занданшатар нарын авч буй арга хэмжээ, хүлээлгэж буй хариуцлага гэдэг нь энэ бололтой.

Ингэлээ гээд Монгол банкны үйл ажиллагаа сэргэж ам.долларын ханш буурах уу. Манай улс маш хурдан “саарал” жагсаалтаас гарах уу?. Нэмэгдэхүүний байрыг солиход нийлбэрийн чанар өөрчлөгддөг болсон уу…

А.ТАМИР

АРДЧИЛАЛ.МН