Ерөнхий сайд У.Хүрэлсүхийн улаан хамгаалагчид төрийн ордон, МАН-ын цагаан байшингаар дүүрэн. Тэдний хамгийн аюултай хэсэг нь мөнөөх троолууд, цуламууд нь юм.

Троол, цуламын талаар экс Ерөнхийлөгч Ц.Элбэгдорж “Троол” нийтлэлдээ тодорхой бичсэн байдаг. Түүний оношилсноор тэд “бусдыг сэлмээр балбах атлаа, өөрсдийг нь чүдэнзээр хатгахад эвхрэн унадаг. Тэд цахимбарынхаа араас, дэлгэцийн цаанаас бас гар утаснаасаа өөрөөсөө өөр үзэлтнүүдийг, ажил хэрэгч хүмүүсийг, эмэгтэйчүүдийг, тэднийг үл тоогчдыг, тэдэнтэй зарга заальхай болдоггүй нэгнийг гутаах доромжлохыг гаргууд хийдэг цуламууд.

Түүнчлэн тэд өөрийн байтайн адил мөн өөрийн тэтгэгч тэжээгч, хөөргөн дэвэргэгчтэй байдаг. Тэжээл нь тасарвал эзнээсээ урвах гэж үзнэ. Эзнээ ч айлгана, эргэж заримдаа ноцно. Эсхүл эзнийхээ занг зүрхэнд нь орсон юм шиг мэдэх тул өстөнг нь илүү зэрлэгээр элдэвлэдэг. Үнэнчээ үзүүлж байгаа нь тэр. Эзэндээ шинэ, ноцтой баримтаар бэлэг барихыг үргэлж хичээнэ. Энэ зорилгоор шулам ордон өргөө ч хэснэ, шорон ч өнгийнө, тив тэнгис ч гаталж ниснэ. Харин эзнийхээ чөтгөр атаархам нүгэл, луйврыг хичнээн харавч, мэдэвч, сонсовч тэр тухай ган хийхгүй. Бүүр хулгай худлынх нь хамтрагч, далдлагч, угаагч болдог. Эзнийхээ буруу гарын угаадас гишгэдсийн албан ёсны цэвэрлэгч болон мэргэшдэг” ажээ.

Яг ингэж оношилж хэлсэнчлэн сүүлийн үед улс төрчдийг, сэтгүүлчдийг, жирийн иргэдийг цахим орчинд намнадаг, дэлхийгээс зайлуулдаг хэсэг бүл троолууд, цуламууд МАНдаад буй. Тэд өмнүүр нь хөндөлдсөн хэнийг ч, өөрт нь таалагдаагүй юуг ч тэд балбах, цавчих, гутаах, доромжлох, гүтгэх ганц үүрэгтэй. Дээр хэлсэнчлэн эзэндээ таалагдахын тулд юуг ч хийхээс сийхгүй араатнууд. Тэд өдөр бүр хэн нэгнийг өөрсдийнхөө цахимбарт дүүжилж, цовдолсоор байна.

Тэгвэл тэдгээр нууцлагдмал троолууд, цуламуудын зарим нь өөрийн хийсэн үйлийн ул мөрөөс үүдэн илчлэгдэж эхэлжээ. Тодруулбал, Монгол Улсын Ерөнхий сайдын хажууд, Монгол төрийн ордонд цахим гэмт хэрэг үйлддэг бүлэг троол, цулам байгааг өдгөө троолуудын довтолгоонд өртөөд буй сэтгүүлч Н.Өнөрцэцэг мэдээлж эхэлжээ.

Тэрбээр, “У.Хүрэлсүхийн зөвлөх нь троллчин бөгөөд саарал ордонд цахим гэмт хэрэг үйлдэгдэж байна. Баримтуудаа хуулийн байгууллагад өгч шалгуулах учир энд нийтэлсэнгүй. (хөдөлшгүй)

Төрийн минь сүлд өршөөг. Төр минь амгалан бол түмэн олон минь тайван. Би төрөө хүндэлдэг энгийн л сэтгүүлч. Өнөөдөр 180 000 төрийн албан хаагч өглөөнөөс орой хүртэл  энэ төрийн ажлыг үргэлжлүүлж яваа, халуунд нь халж хүйтэнд хөрч жирийн бор амьдралаар амьдарч л яваа. Гэтэл өнөөдөр төрийн өндөр дээд албан тушаалтнуудын хажууд яг ямар аймшигтай хүмүүс цүнх бариад явж байна вэ?

FM-ийн хөтлөгч хийж явсан Алтанхуягийн Үйлстөгөлдөр хэмээх залуу төрд нэг ч өдөр ажиллаж үзээгүй байж зүгээр л бялдууч, юу ч хийхээс буцахгүй хүн чанаргүй, нууц хаягаас бусдыг харлуулж чаддаг гэдгээрээ У.Хүрэлсүхэд таалагдаж Монгол Улсын Ерөнхий Сайдын зөвлөхөөр ажиллах болсон. Ордонд хааяа таарахаараа мэнд устай, зүгээр л сайхан найзууд.

“Хориотой мэдээ” гэх пэйж хаягийг Монгол Улсын ерөнхий сайдын зөвлөх болсноосоо эхэлж ажиллуулж, бусдыг харлуулж доромжилж иржээ. Сэтгүүлч Н.Өнөрцэцэг намайг доромжилж гүтгэсэн бүх мэдээллийг гаргаж, спонссор бүүст хийх ажлыг Монгол Улсын Ерөнхий сайдын зөвлөх А.Үйлстөгөлдөр хийжээ.

ЗГ-аа шүүмжлэх нь сэтгүүлчид байдаг энгийн үзэгдэл бөгөөд эрүүл харилцаа. ЗГ шахмал түлш түлээд угаартаад байгаа асуудлыг иргэдээсээ нуусан том гэмтэй, үүнийг сэтгүүлчид үүргийнхээ хүрээнд олонд нээлттэй болгосон. Энэ дагуу хаана хаанаа ажлаа эрчимжүүлээд олон хүний амь эрстэхийг хамгаалсан ч байж болно.

Би Монгол Улсын Ерөнхий сайдад зөвлөдөг хүнийг алсын хараатай, уужуу, шударга, тийм л хүн байгаасай гэж боддог. Хуурамч мэдээтэй дэлхий нийтээрээ тэмцэж байхад Монгол Улсын Ерөнхий сайдын зөвлөх нь хуурамч мэдээ бэлтгээд, түүнийгээ спонссор хийгээд троллын үүрэгтэй ажиллаж байна. Харамсалтай байна” гэж цахим хуудастаа мэдээлж эхэлжээ.

Тэгэхээр МАН-ын цагаан байшингаас, эсвэл төрийн ордноос журмын нөхдөө, сөрөг хүчнийхэнг, сэтгүүлчдийг, иргэдийг, хэнийг ч болов цахим орчинд, хуурамч хуудсаар тастан хаяж, нүдэж балбаж, гүтгэж гутааж, харлуулж шарлуулдаг мөнөөх троолууд, цуламууд "шударга" Ерөнхий сайд У.Хүрэлсүхийн албатууд гэдэг нь нэгэнт ил болж байх шиг...

А.НАМИР

ZASGIINMEDEE.MN