Өмнөговь аймгийн Эрүүл мэндийн газрын 60 гаруй хүн байгууллагынхаа ойг тэмдэглэх үеэрээ хоолны хордлого авч эмнэлэгт хүргэгдсэн талаар бид өмнө нь мэдээлсэн.

 Бид хордлого гарсны дараахан тус аймгийн Мэргэжлийн хяналтын газартай холбогдож, хордлогын шалтгаан нөхцлийн талаар тодруулахад, "Эрүүл мэндийн газрын ойн нэгдсэн хүлээн авалтад оролцсон хүмүүст хоолны хордлогын шинж тэмдэг илэрсэн. Үүнтэй холбоотой хяналт шалгалтын ажил үргэлжилж байна. Бүх шинжилгээ, дээж авагдсан. Хариу нь гараагүй байна" гэх хариултыг өгсөн юм.

Харин энэ асуудлаар дахин холбогдож, хариу гарсан эсэхийг тодруулахад, "Энэ сарын 9-ний өдөр Өмнөговь аймгийн Даланзадгад сумын “Даянхаан” зоогийн газарт зохион байгуулагдсан хүлээн авалтад орсон хүмүүс хоолонд хордсон. Үүнтэй холбогдуулан, Аймгийн Мэргэжлийн хяналтын газраас тус зоогийн газарт хяналт шалгалт хийж, хүлээн авалтад хэрэглэсэн хүнсний түүхий эд материал, хоолны дээж, ахуйн ус, орчны арчдас, мөн хүнсний түүхий эд бүтээгдэхүүнийг худалдаалж байсан дэлгүүрүүдээс хүнсний бүтээгдэхүүний дээж зэрэг нийт 28 нэр төрлийн сорьцийг авч лабораторид шинжлүүлсэн. Шинжилгээний дүнгээр тухайн хүлээн авалтад бэлтгэсэн зууш, 2-р хоол, мөн үлдэгдэл тахианы мах, өндөг, хиам, гахайн утсан мах зэрэг бүтээгдэхүүнээс гэдэсний бүлгийн эмгэг төрөгч нян /Salmonella/, мөн өвчтөнүүдээс авсан шинжилгээгээр тухайн хоолны хордлого үүсгэгч нян илэрч, Салмонела нянгаар үүсгэгдсэн хоолны хордлогын дэгдэлт болох нь тогтоогдсон. Аймгийн Мэргэжлийн хяналтын газраас БОЭТ-ийн халдвартын тасаг болон шинээр дэлгэсэн тасагт халдвар хамгааллын дэглэм хангуулах, эмчилгээ, оношилгооны чанарт хяналт тавин, зөвлөгөө зөвлөмжөөр хангаж ажиллаж байна" гэв.

Хариуцлага алдсан зоогийн газарт ямар арга хэмжээ авсан талаар тодруулахад, “Даянхаан” зоогийн газарт нь байнгын үйл ажиллагаа явуулдаггүй бөгөөд одоогоор үйл ажиллагааг зогсоож, Зөрчлийн хэрэг нээж, зөрчил шалган шийдвэрлэх үйл ажиллагааг үргэлжлүүлэн хийж байна. Мөн хүлээн авалтад хэрэглэсэн хүнсний түүхий эд бүтээгдэхүүнийг худалдаалсан дэлгүүрүүдэд хяналт шалгалтын ажил үргэлжлэн хийгдэж байна" гэсэн юм.

Мөн энэ талаар Өмнөговь аймгийн Эрүүл мэндийн газрын дарга Ц.Өнөржаргалтай холбогдож тодруулахад, "80 жилийн ойн хүлээн авалтад нийд 170 гаруй хүн оролцсоноос 60 орчим хүнд нь хордлогын шинж тэмдэг илэрсэн. Хордсон хүмүүс биеийн байдал сайжирч байгаа. Ойн арга хэмжээгээ зохион байгуулсан "Даянхаан" гэх газар манай аймагтаа хамгийн томд тооцогдохоор том заалтай газар учраас тэр газрыг сонгосон. Гэтэл хариуцлага алдаж, ийм асуудал үүсгэсэнд харамсч байна" гэдгээ илэрхийлсэн юм.

Эх сурвалж: Zaluu.com

Т.Гэрэл