Монгол улсын Засгийн газар болон БНХАУ-ын Засгийн газар хоорондын хэлэлцээрийн дагуу хөнгөлөлттэй зээлийн хүрээнд Гачууртын уулзвараас Налайх-Чойрын уулзвар хүртэлх 20.9 км авто замыг шинэчлэх ажлыг  2019 оны 04 дүгээр сарын 20-нд эхлүүлсэн. Тус замын шинэчлэлийн ерөнхий гүйцэтгэгчээр БНХАУ-ын “Синохайдро Лимитед Корпорейшн”, туслан гүйцэтгэгчээр Монголын “Тэгштплант”, “Гашууны гол”, “Дардан-Говь” компани ажиллаж байна. 

Энэхүү бүтээн байгуулалтад нийтдээ 36.5 сая ам.доллар зарцуулагдах гэнэ. Нийслэлийн удирдлагуудын хэлж буйгаар, мөн тус замыг шинэчлэх гүйцэтгэгч компанийн график тооцоогоор 2019 оны 11 дүгээр сарын 30-нд замын зорчих хэсгийг нээхээр байгаа. 

Өнөөдрийн байдлаар тус замын хөрс хуулалт, тэгшилтийн ажил ерөнхийдөө хийгдэж дуусжээ.  Одоогоор замын ажил 20 гаруй хувийн гүйцэтгэлтэй байна. Замын ажлын 75 хувийг дотоодын гурван аж ахуй нэгж, 25 хувийг хөрөнгө оруулагч талын гүйцэтгэгч компани хийх ажээ.

Харин иргэдийн зүгээс тус замын чанарт ихээхэн санаа зовниж байна. Учир нь өмнөх зам нь хэдийгээр муудсан ч гэсэн 58 жил Монголчуудыг тээж чанараа баталсан байдаг. Тийм ч учраас тус замаар тогтмол зорчдог жолооч нар одоо өмнөх шиг ээ тийм чанартай, зузаан зам тавих нь юу л бол гэж тус орчмоор зорчих тоолондоо ярьж явна.

Тэгвэл Налайхын шинэ замын Ерөнхий гүйцэтгэгч болох БНХАУ-ын компани нь барьж буй замдаа гурван жилийн баталгаа өгчээ. Түүнээс цааш хэрхэх нь тэдэнд хамаагүй болж элэгдэж, гэмтвэл Монголчууд бид өөрсдөө хариуцах юм байна. Тэрчлэн өнөөдөр мөрдөгдөж байгаа Авто замын тухай хуульд 28.4.Шинээр барьж байгуулсан авто зам, замын байгууламжийн чанарын баталгаат хугацаа нь гүйцэтгэгч болон техник, технологийн хяналт тавьсан хуулийн этгээдэд тус бүр гурван жил байна. хэмээн заасан учраас түүнээс дээш болон доош жилийн баталгаа гэж байхгүй юм.

Энэ талаар Нийслэлийн Засаг даргын зам тээврийн төслүүдийг хариуцсан төслийн удирдагч, орлогч Б.Отгонсүх хэвлэлд өгсөн яриандаа “шинээр тавигдаж байгаа зам, барилгын ажилд гол анхаарч байгаа чиглэл, баримталж байгаа бодлого нь чанар. Чанартай, гүйцэтгэл өндөртэй байх ёстой гэдэг шаардлагыг гүйцэтгэгч нарт тавьж байгаа. Түүний дараа ногоон байгууламж, явган хүний зам, дугуйн замтай байхыг зорилт болгодог. Энэ бол олон улсын чанар стандарт. Налайхын замын ажилд эхнээс нь дуустал зөвлөх компани ажиллаж байгаа. 

Ерөнхий гүйцэтгэгчийн зүгээс шинэ замд гурван жилийн баталгаа өгсөн. Зам тээврийн хөгжлийн яам болон Нийслэлийн авто замын газраас байнга хяналт тавьж ажилладаг. Өдөр бүр очиж танилцдаг. Замын далангийн ажил 07 дугаар сарын 09-нд дуусаад цементэн хучилт авна. Цементэн хучилт хийж дууссаны дараа асфальт дэвсэнэ.  Ийм үе шаттайгаар ажил явагдана. Замын зузаан нь цементэн хучилт нь 10 орчим сантиметр, асфальтан хучилттайгаа нийлээд  30 орчим сантимерт зузаан болно гэж цаанаасаа тооцоолсон юм билээ.” гэж онцолжээ.

А.ТАМИР

АРДЧИЛАЛ.МН