УИХ-ын дарга Г.Занданшатараар ахлуулсан ажлын хэсэг  өнөөдөр /2019.05.22/ Хүний эрхийн үндэсний комиссын үйл ажиллагаатай танилцлаа.

Уулзалтын эхэнд ХЭҮК-ийн дарга Ж.Бямбадорж үйл ажиллагааны чиглэл танилцуулсан юм. Тэрбээр “Манай байгууллага гомдол санал, хяналт шалгалтын хэлтэс, захиргаа хамтын ажиллагааны хэлтэс, хүний эрхийн боловсрол, судалгааны хэлтэс гэсэн гурван хэлтэстэй үйл ажиллагаагаа явуулдаг. Юуны түрүүнд манай байгууллага ажлын байрыг нэмэгдүүлэн ажиллах нь асуудал нэн тэргүүний асуудал болоод байна. Манайх үйл ажиллагааны чиглэлээ дүн шинжилгээ судалгаан дээр тулгуурлан хөгжүүлэх чиглэлтэй байна. Иймд судалгааны хэсгийн ажлын албадаа мэргэжлийн судлаачдыг оролцуулсан бүрэлдэхүүнээ нэмэгдүүлэх  шаардлагатай гэж үзэж байгаа. Мөн шинэ хуулийн төслийг УИХ-д өргөн барих гэж байгаатай холбогдуулан урьдчилан сэргийлэх тал дээр ажиллах чиглэлийг манайд хариуцуулсан.

Хүний эрхийн асуудалтай холбоотой анхаарал татдаг асуудлын нэг нь  эрүүдэн шүүхтэй холбоотой асуудал юм. Манай байгууллагын гомдол шалгалтын хэлтэст эрүүдэн шүүхтэй холбоотой он гарснаас хойш 35 санал гомдол ирсэн. Дараачийн нэг асуудал бол хүүхдийн хүчирхийлэл, эмэгтэйчүүдийг ялгаварлан гадуурхалтын асуудлууд байна. Өнгөрсөн жил бид хөгжлийн бэрхшээлтэй эмэгтэйчүүдийн асуудлыг хэлэлцсэн бол энэ жил малчин эмэгтэйчүүдийн эрхийн асуудлаар ХЭҮК болон НҮБ-ын хүн амын суурин төлөөлөгчийн газартай хамтран хоёр аймагт ажиллаа” гэсэн юм. 

Энэ үеэр ХЭҮК-ын гишүүн П.Оюунчимэг ХЭҮК-ийн хийж хэрэгжүүлсэн ажлын дүн мэдээг танилцуулсан юм. Үүнээс хүний эрхтэй холбоотой хууль тогтоомжийн хэрэгжилтийн талаарх хэд хэдэн асуудлыг хөндсөн юм.

Тэрбээр “2011 оноос хойш хэрэгжиж эхэлсэн Жендэрийн эрх тэгш байдлын асуудлаар хууль баталсан. Гэтэл энэ хуулийн талаар иргэд тэр тусмаа хөдөө орон нутагт ойлголт багатай байна. Жендэрийн эрх тэгш байдлын тухай хуулийг хариуцсан тусгайлсан алба Ерөнхий сайдаар ахлуулсан тусгайлсан хороо ажилладаг гэдгийг мэддэг дарга нар маш ховор байна. Үүнээс  жендэрийн бодлого төлөвлөлт, жендэртэй холбоотой асуудал хөдөө орон нутагт мэдлэггүй дарга нараас болж, хэрэгжихгүй байна. Мөн бид сүүлийн 13 жилийн хугацаанд Монгол улс дахь үндэсний цөөнхийн эрхийг хамгаалах асуудлаар ажиллаа. Тухайлбал Баян-Өлгий аймагт Монгол хэлээр хичээл заадаг сургууль цэцэрлэг ховор, үүнээс болж Монгол хүүхдүүдийн сурч боловсрох эрх зөрчигдөж байгааг анхаарах хэрэгтэй. 2005 онд Тува Монгол хэлний асуудлаар хууль батлуулж байсан. Гэтэл аймаг орон нутаг өөрөө хэрэгжүүлж чадахгүй, хэрэгжүүлэх хүсэлгүй байна. Тус аймгийн  Цэнгэл суманд 13 цэцэрлэг үйл ажиллагааг явуулж байгаагаас  Монгол хэлээр үйл ажиллагаа явуулдаг нэг ч цэцэрлэг байхгүй байна” гэлээ. 2005 Ооноос хаалттай байгууллага буюу зэвсэгт хүчний байгууллагад хяналт шалгалтын ажлын бүсийн төвшинд явуулсан. Цэргийн дэг, дүрмийн бус харилцаатай холбоотой асуудлууд нээлттэй болж эхэлж байна” гэсэн юм.

Ардчилал.мн

Б.Бадралмаа