Газрын доорх баялагаас иргэн бүр тэгш хувь хүртэх ёстой гэсэн улстөрчдийн олны хайрыг татах гэсэн санаа биелэлээ олж “Эрдэнэс Тавантолгой” компанийн хувьцаанаас иргэн бүрт нэг сая төгрөгийн буюу 1072 хувьцааг тараасан. Тухайн үеийн эрх баригчид, улс төрийн тоглолтонд оролцогчид ч санасандаа хүрч УИХ болон Засгийн газрын зөөлөн суудалд тухлах эрхээ дөрвөн жилээр сунгаж байлаа. Харамсалтай нь өнөөх 1072 хувьцаа авсан иргэн бүр нь л өнөөг хүртэл олигтой ашиг хүртэж чадахгүй байсаар байна. Ашиг өгөх нь бүү хэл зарим иргэдээсээ бэлэн мөнгө нэрийдлээр өнөөх хувьцаанаас нь төр өөрөө дээрэмдсэн. Оюутны сургалтын төлбөрийг төлөх, иргэн бүрт сар бүр бэлнээр 21000 төгрөг тараах гэх мэтчилэн олон аргыг хэргэлсэн. Ингэхдээ төрийн албан хаагчийн зээлээр суралцаж байсан оюутнуудыг хүртэл өөрсдөөс нь асуулгүйгээр шууд хасч нэгээс хоёр жилийн сургалтын төлбөр болгон булаасан. Ерөнхийдөө 1072 гэсэн нэр томъёо гарснаас хойшхи түүх ийм.

Харин бас нэгэн залилангийн шинжтэй үйлдлүүд цахим ертөнцөд хүчтэй тархсаар ирсэн нь 1072 хувьцааг бэлэн мөнгөөр худалдан авч байна гэсэн зар. Энэ заранд хууртагдсан, итгэл нь цөхөрсөн, бэлэн мөнгөний яаралтай хэрэг гарсан олон иргэн энэ зарын дагуу явдал чирэгдэл болсоор байна. Сүүлийн үед Тавантолгойгоос иргэдэд мэдээлэл хүргэж, тусгай сайт ажиллуулж байгаа ч нөлөөлсөн үү ямартаа ч 1072 хувьцааныхаа дансыг нээлгэж албан ёсны эзэмшигч болж байгаа аж. Гэвч энэ бас л хангалтгүй байсаар байна. Тиймээс энэ талаарх мэдлэг мэдээллийг олон нийтэд түлхүү хүргэх нь чухал. Тэгж байж л өнөөх улстөрчдийн “Иргэн бүр ижил хувь хүртэх” эрхээ эдлэх учиртай. Түүнээс гадна хамгийн том асуудал бол энэхүү хувьцааг амь оруулах. Ингэхийн тулд мэдээж “Эрдэнэс Тавантолгой” компанийн үйл ажиллагаа жигдэрүүлж, хөрөнгийн биржийн олон улсын зах зээл дээр хувьцааг нь гаргах нь чухал гэдгийг ойлгож нэлээд шаргуй зүтгүүлсээр байгаа. Гэвч өнөөх улстөрчдийн маань мэргэн ухаанд бас ямар мэргэн санаа орж ирээд 1072 хувьцааг орвонгоор нь эргүүлэх, эсхүл амь оруулан үнэхээр ард иргэдийнхээ магнайг тэнийлгэхийг одоогоор таашгүй. Ямартаа ч олигтойхон амь орж өгдөггүй, амьсгалаа ч татаж өгдөггүй 1072 ХУВЬЦАА одоог хүртэл амьсгалах төдий байсаар байна. Харин бидний хүлээсэн хүлээлт хэрхэх талаар харж суухаас...  

Т.ДАРХАН