Интернет болон цахим технологийн эрин үед хүүхдийн сурах, хөгжих, тоглох, бие биетэйгээ харилцах хэлбэр үндсээрээ өөрчлөгдөж байна. Тэдэнд өөрийгөө илэрхийлэх, мэдлэг боловсрол эзэмших, авьяас чадвараа хөгжүүлэх маш өргөн боломжууд нээгдсээр байна.

Энэ асуудалд үндэслэж, “Цахим орчин дахь хүүхдийн эсрэг бэлгийн хүчирхийлэл, мөлжлөгөөс урьдчилан сэргийлэх, арга хэмжээ авах нь” сэдэвт хэлэлцүүлэг 9 дүгээр сарын 19-ны өдөр боллоо.

Монгол Улсын Хөдөлмөр, нийгмийн хамгааллын яам, НҮБ-ын Хүүхдийн Сан хамтран зохион байгуулж буй хэлэлцүүлгийн зорилго нь тухайн асуудлаарх салбар дундын болон байгууллага хоорондын хамтын ажиллагааны ач холбогдлыг онцлон хөндсөн юм. Ялангуяа үүрэн телефоны операторууд, интернетийн үйлчилгээ эрхлэгчид, контент үйлдвэрлэгчид болон түгээгчид зэрэг мэдээлэл харилцаа, технологийн салбарынхан чухал үүрэгтэйг онцолж байна.

Цахим орчны хэлбэр сүүлийн жилд их дэлгэрч, хэрэглэгчдийн тоо, нас, хүйс харгалзахгүй өсөн нэмэгджээ. Тиймээс хүүхдүүд цахим орчинд хүчирхийлэл, тэр дундаа бэлгийн хүчирхийлэл, мөлжлөгт өртөх бодит эрсдэлд өртөх болжээ.

"Интернет болон цахим орчинд хүүхдүүд өөрсдийн насанд тохироогүй зохисгүй контент буюу мэдээлэл, зураг, бичлэг зэргийг олж үзэх, садар самуун, хүчирхийллийн шинж чанартай  контентыг бусдаас хүлээж авах, хүчирхийлэл, бусад гэмт хэргийн хохирогч болох явдал гарч байна. Энэ нь дэлхийн олон улс үндэстний Засгийн газар, мэдээлэл, технологийн салбар, иргэний нийгэм, олон нийтийн хувьд томоохон тулгамдсан асуудал болоод байна. Монгол Улсад ч энэ асуудал сүүлийн үед хурцаар тавигдаж, анхаарал татаж байна.

Монгол Улсын Засгийн газар “Бид Хамгаална” олон улсын эвсэлд нэгдсэнээр, цахим орчин дахь хүүхдийн эсрэг бэлгийн хүчирхийлэл, мөлжлөгөөс урьдчилан сэргийлэх, хариу арга хэмжээ авах үндэсний загварын дагуу үйл ажиллагаагаа төлөвлөн хэрэгжүүлэх үүрэг хүлээн ажиллаж байгааг сайшааж байна. Энэ чиглэлээр салбар дундын хамтын ажиллагааг хангахаар төрийн байгууллагуудын төлөөлөл бүхий ажлын хэсэг ажиллаж байгаа нь  чухал үр дүн юм. Гэсэн хэдий ч, уг асуудал ярвигтай, өргөн цар хүрээг хамардаг учраас цахим орчинд хүүхдийг бэлгийн хүчирхийлэл, мөлжлөгөөс үр дүнтэй хамгаалахын тулд төрийн байгууллага болон дээр дурдсан бүх байгууллага хамтран ажиллах зайлшгүй шаардлагатай байна." гэж зохион байгуулагч тал онцлон тэмдэглэв.

Хэлэлцүүлэгт НҮБ-ын Хүүдийн Сангийн Монгол дахь Суурин төлөөлөгч Алекс Хайкенс, УИХ-ын Цахим бодлогын түр хороо, Хөдөлмөр, нийгмийн хамгааллын дэд сайд С.Мөнгөнчимэг, ИБУИНВУ-аас Монгол Улсад суугаа Элчин сайд Филип Малон, Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын дэд дарга Б.Халиун, Харилцаа холбооны Зохицуулах хорооны дэд дарга Д.Сэрээдорж нар оролцсон.

Хэлэлцүүлгээр дэлхий дахин, бүс нутаг, улс орны түвшинд хүүхдийг цахим орчинд хамгаалах асуудлаар мэдээлэл, харилцаа, технологийн салбарын холбогдох хууль тогтоомж, бодлого хөтөлбөр, тэдгээрийн хэрэгжилт, интернетийн салбарын техник, технологийн асуудлууд, санал, гомдлыг шийдвэрлэх байдал зэрэг сэдвийн хүрээнд яригдсан юм, Эдгээр сэдвийн хүрээнд салбарын хүмүүс өөрсдийн байр суурь санаа бодлоо илэрхийлсэн.

Энэ үеэр Гэр бүл, хүүхэд, залуучуудын хөгжлийн газрын дэд дарга Б.Халиун "Цахим орчинд хүүхдийн эрх таван төрөлд зөрчигдөж байна. 2017 онд цахим орчинд эрх нь зөрчигдөж байгаа талаар Хүүхдийн тусламжийн утас 108 төвд 237 дуудлага ирсэн. Цахим орчин дахь хүүхдийн эсрэг бэлгийн хүчирхийлэл, мөлжлөгөөс урьдчилан сэргийлэхэд орчин үеийн техник технологитой хөл нийлүүлэн алхах нь чухал. " гэж хэлж байв.

Б.Баярмаа