Монгол, Японы нийт 12 гэрэл зурагчин “Бүсгүй мэлмий 2” гэрэл зургийн үзэсгэлэнд бүтээлээ дэлгэсэн байлаа. Энэхүү  үзэсгэлэнгээ 9 дүгээр сарын 20-22-ны өдрүүдэд олон нийтэд үзүүлж байна.

Энэ үеэр Японы гэрэл зурагчин Мацүмото Ёшикотой гэрэл зургийн онцлогоос нь сонирхож, ярилцлаа. Тэрээр 2004 онд анх Монголд “Монголчууд” гэрэл зургийн бие даасан үзэсгэлэнгээ гаргаж байжээ.Тэр цагаас хойш манай улсад олон удаа ирж, өнөөг хүртэл монгол эмэгтэйчүүдийн гадна төрх хэрхэн өөрчлөгдсөн, мөн тэдний ажил, мэргэжил, амьдралыг харуулсан “Mongalian women” гэрэл зургийн цомог хэвлүүлсэн байна.

-Та хэдэн жил гэрэл зураг авч байгаа вэ?

-Би 25 жил гэрэл зураг авч байгаа. Нягтлан бодогч мэргэжилтэй ч гэрэл зураг миний хобби.

-Таны авсан гэрэл зургуудийг харахад эгэл жирийн япон хүний амьдралыг биш урлагийн нэгэн чөлөөт ертөнцийг харуулжээ. Эдгээр гэрэл зургуудаасаа тайлбарлаж өгөөч?

-2000 он гарахаас өмнө би япон залуучуудын загвар, имиж төрхийг  илэрхийллийг зорьж, эдгээр гэрэл зургуудыг авсан юм. Япон залуучууд амралтын ганцхан өдрөөр дуртай газраа очиж, өөрийнхөө шүтдэг урлагийн хүмүүсийн загварыг дуурайн гоёж, мөн загварын чөлөөт дуртай хувцас өмсч, нүүр будалт хийж, өнгөрүүлдэг.

-Японд залуучууд нь ингэж гадаад төрх, имижээ өөрчилдөг  өдөрлөг  заншил болон тогтсон юм уу?

-Энэ бол тогтсон арга хэмжээ биш. Сонирхол нэгтэй  залуучууд 7 хоногийн бүтэн сайн өдөр бүр тогтсон нэг газрыг сонгож цуглаад, өөрийнхөө имижийг өөрчилж, хөгжицгөөдөг. Нэг ёсондоо ингэснээрээ мөрөөдлөө биелүүлж байгаа юм.

-Японд маш олон үйл явдал, арга хэмжээ болдог. Гэтэл та яагаад заавал залуучуудын имиж, төрхөө өөрчилдөг тэр үйл явцыг сонгож, гэрэл зураг авсан юм бол?

-Япон Улсын Гэрэл зургийн холбооноос  зохион байгуулсан уралдаанд 20-р зууны Япон орныг гэрэл зургаар илэрхийлэх  сэдэв байсан. Тэр чиглэлийн дагуу судалгаа хийж, япон залуучуудын орчин үеийн төрх, имиж, мөрөөдлийг харуулсан гэрэл зургуудаа авч байсан. “Бүсгүй мэлмий2 “ үзэсгэлэнд энэ гэрэл зургуудаасаа дэлгэн тавиад байна.

-Та “Mongolian women” нэртэй гэрэл зургийн цомогтоо юуг онцолсон бэ?

-Энэ цомогтоо Монголын нийгмийн янз бүрийн салбарт ажилладаг эмэгтэйчүүдийн хөрөг гэрэл зургуудаар өнөөгийн байдлыг илэрхийлсэн.

Миний гэрэл зургийн илэрхийлсэн гол санаа нь Монголын эдийн засгийн тулгуур нь эмэгтэйчүүд юм. Улстөрч, бизнесмэн, барилгын салбарт ажиллаж буй эмэгтэйчүүдийн гэрэл зургууд бий. Мөн Монголын тал нутаг, хөдөөгийн амьдрал дахь эмэгтэйчүүдийн тухай ч харуулсан.

www.ardchilal.mn Ярилцсан Б.Баярмаа