УЦУОШГ-аас урьдчилан сэргийлэх мэдээ гаргажээ. Өнөөдрөөс эхлэн ихэнх нутгаар нойтон цас орж, эрс сэрүүсэх цаг агаарын аюултай үзэгдэл ажиглагдах нөхцөл бүрдэж байгаа гэдгийг анхааруулав.

Бүр тодруулбал, есдүгээр сарын 19-нд баруун аймгуудын нутгийн зүүн хэсэг, төвийн аймгуудын ихэнх нутгаар, 20-нд төв болон говийн аймгуудын нутгийн зүүн хэсэг, зүүн аймгуудын ихэнх нутгаар хур тунадас нойтон цас орж, салхи 16-18м/с хүрч цасан шуурга шуурч, эрс сэрүүсэх зэрэг цаг агаарын аюултай үзэгдэл болох ажээ.

Үүний улмаас тариа, ногоо нойтон цасанд дарагдаж болзошгүй байна. Энэ л түгшүүр. Тариаланчдын хувьд 9, 10 дугаар сар тэнгэр аргадаж, сэтгэл донсолгосон өдрүүд байдаг байх. Хаваржин зунжин тарьж ургуулсан их ажлынхаа үр шимийг хүртэх маш хариуцлагатай бөгөөд эгзэгтэй өдөр хоногууд байдаг. Гэвч хангай дэлхий тэр бүр тааламжтай байдаггүй.

Тухайлбал, 2009 оны есдүгээр сарын 18-20-нд газар тариалангийн бүс нутгаар ихээхэн хэмжээний цас орсон бөгөөд дээрх хугацаанд 0.0-31.6 мм тунадас орсноос хамгийн их нь Сэлэнгийн Ерөөд 31.6 мм, Орхонд 30.1мм, Шаазгайт, Хүдэрт 27.0мм, Дархан хотод 26.8 мм цас орж байсныг мэргэжлийн байгууллагынхан сануулжээ. 2009 оны тэр намар ургуулсан тарианыхаа нэлээд хэсгийг цасан дор үлдээж байсан санагдана.

Энэ жилийн тухайд намрын налгар өдрүүд тийм ч элбэг тохиолдсонгүй. Ихэнхдээ бороо хуртай байна. Залгуулаад өнөөдрөөс эхлэн цас шуургатай гэсэн мэдээлэл ирлээ.

Бороо хур хожуу орсноос энэ жил тариа будааны болц оройтсоныг салбарын яамныхан тодотгож байгаа. Тиймээс тарианы болц, хүн хүч, техник хангамж, цаг агаарын төлөв байдлыг харгалзан ургацыг технологийн дагуу богино хугацаанд хураан авахыг зөвлөмж болгож байгаа билээ.

Улсын хэмжээнд 2018 оны 6 дугаар сарын байдлаар нийт 497,2 мянган га талбайд тариалалт хийсэн гэсэн мэдээлэл байсан. Эдүгээ ургацын урьдчилсан балансаар өмнөх жилтэй харьцуулахад ойролцоогоор 2 дахин их ургац авах төлөвтэй байна.

Өөрөөр хэлбэл 450 мянган тонн үр тариа, 151 мянган тонн төмс, 95 мянган тонн хүнсний ногоо, 30 мянган тонн тосны ургамал, 86 мянган тонн малын тэжээл хураан авна гэсэн тооцоолол бий.

Энэ намрын ургац хураалтын ажил есдүгээр сарын 05-ны өдрөөс ангилан хадалтаар эхэлсэн бөгөөд энэ сарын 10-ны байдлаар 3473 га-г ангилан хадаж, нийтдээ 6.2 мянган га-гаас 8.1 мянган тонн үр тариа, 2.4 мянган га-гаас 34.5 мянган тонн төмс, 2 мянган га-гаас 23 мянган тонн хүнсний ногоо тус тус хураан аваад байна. Гэхдээ энэ удаагийн цаг агаарын аюултай үзэгдлийн цаана гарчихвал цаг нар хоёр ч бас байна аа, байна.

Цаг агаар нь тогтуун байвал төлөвлөсөн хэмжээндээ ургацаа авах боломж бий.

Өнгөрсөн хавар Монгол Улсын Засгийн газраас 7 аймгийн 60 сумын 113 багийг газар тариалангийн бүс нутгаар тогтоож, хашаажуулах ажлыг эхлүүлээд байгаа билээ. Үүнийгээ дагаад нэгж талбайгаас авах ургацын хэмжээ ч нэмэгдэнэ хэмээн үзэж байгаа юм.

эх сурвалж:http://www.zaluu.com/read/297df71c4

М.Нэргүй