Залуу уран бүтээлч Л.Мягмаржавын "Шонхор" нэртэй бие даасан үзэсгэлэн Norpheiарт галерейд долоодугаар сарын 20-ны өдөр нээлтээ хийлээ.

Энэ үеэр залуу зураач Л.Мягмаржавтай ярилцлаа.

-Их сайхан бэлгэдэлтэй, тэнгэрлэг амьтан “Шонхор” шувууг зурж, бие даасан үзэсгэлэнгээ гаргаж байгаад баяр хүргэе. Энэ сэдвийг яагаад сонгож, зурах болсноо сонирхуулна уу?

-Их баярлалаа. Би анх шонхор шувуутай танилцаад, таван жил өнгөрлөө. Шонхор шувууг зурах сэдвээ сонгосон учир нь гэвэл Монголын нууц товчоог уншихад шувуугаар шувууг бариулах, мөн сайн эрсээр шувуугаа бариулж дагуулан явах, хооллож байсан юм билээ. Түүнчлэн харцага шувуугаар ан хийлгэдэг байсан.

2013 оны 11 дүгээр сард Дүрслэх, дизайн урлагийн сургуулийн 4-р ангидаа сурч байхад Монголын Шонхорын холбооны төлөөлөгч, гишүүд шонхор шувууг авчирч, танилцуулах өдөрлөг зохион байгуулсан юм. Тэр өдөрлөгт шонхор сургагч багш н.Болдбаатар шонхор шувууг сургуулийн кордиорт нисгэсэн. Нисч яваа шонхор шувууг би хараад монголын бахархалт шувуу юм даа гэж бодож үнэхээр их бахархсан. Тэр үеэр би шонхор шувууг анх удаа зурсан. Тэр цагаас хойш таван жилийн хугацаа өнгөрсөн ч дипломын ажлаа шонхор шувууны талаар судалж, хамгаалсан.

-Олон төрлийн дүрслэлтэй шонхор шувууг зуржээ. Ер нь шонхор шувууг зурахдаа ямар утга санааг илэрхийлсэн бэ?

-Шонхор шувууны бүтээл бүрийн утга санаа өөр өөр. Би 2013 онд дөнгөж эдлэг шонхор шувууг амьдаар нь харж байсан. Өмнө нь сэтгүүл, телевизээс харж байлаа. Монголын эдлэг шонхор шувууг монголчуудад төдийгүй дэлхийд таниулах зорилготой бие даасан үзэсгэлэнгээ нээлээ. Миний бүтээлийн гол сэдэв шонхор шувуу болсон учир цаашдаа ч энэ чиглэлээр бүтээх болно.

-Цаашдын уран бүтээлд нь шонхор шувуу шигээ дүүлэн ниссэн, өндөр амжилт хүсье.

-Шонхор шувууны тухай үзэсгэлэнг минь сурвалжлахаар ирсэн танд их баярлалаа.

Д.Уранчимэг: Монгол зургийн аргаар шонхор зургийг бүтээнэ гэдэг гайхамшиг

Соёл урлагийн сургуулийн Амгалангийн нэрэмжит Дүрслэх, дизайн урлагийн сургуулийн захирал Д.Уранчимэгийн сэтгэгдлийг сонирхлоо.

-Залуу зураач Л.Мягмаржав шонхор шувууг их сайхан зуржээ. Шонхор шувууг монгол зургаар илэрхийлсэн утга санааг уран бүтээлч, багшийн хувьд хэрхэн үнэлж байна вэ?

-Залуу зураач Л.Мягмаржав нь Соёл урлагийн сургуулийн Дүрслэх, дизайн урлагийн сургуулийн монгол зургийн ангийг 2014 онд сурч төгссөн. Миний хамгийн их баярлаж байгаа зүйл бол Л.Мягмаржав нь шонхор шувуу сонирхож эхэлснээс хойш бие даасан анхны үзэсгэлэнгээ дөрвөн жилийн дараа гаргаж байна.

Бид 2014 онд Монголын Шонхорын холбоог урьж, манай сургуульд амьд шувууг авчирч, оюутнуудад зориулсан ирээдүйд зураач болох хүүхдүүдэд цуврал лекц явуулсан. Тэд шонхор шувууны ав, ан хийх тухай болон Монголд шонхор шувуу ямар байдаг гэх мэт шонхор шувууны тухай ойлголтыг хүүхдүүдэд өгсөн юм.

Өнөөдрийг хүртэл шонхор шувуутай танилцаж, уран бүтээлдээ шонхор шувууны сэдвийг сонгож, монгол зургийн аргаар зурж байгаа зураачдын нэг Л.Мягмаржав юм. Монголын нүүдэлчин ард түмний өв, бэлгэдэлтэй сайхан амьтан. Манай залуу зураач Л.Мягмаржав нь нүүдэлчин ард түмний аж амьдрал, ан амьтныг шонхор шувуугаар дүрслэсэн нарийн зураас нь сэтгэлийнх нь гайхамшигт ертөнцийг илэрхийлжээ гэж багшийн хувьд бодож байна.

Энэ үзэсгэлэнгээс шонхор шувууны аж байдлын тухай сэдэвтэй зургуудыг үзэгчид харж болно. Миний баярлаж байгаа нэг зүйл бол эдгээр зургуудаас бараг тал нь шууд зарагдах шиг боллоо. Үзэсгэлэн нээгдээд хэдхэн минутын дараа бүтээлүүдийн тал нь зарагдана гэдэг ховор тохиолдол юм.

Энэ нь зураачид болон үзэгч олон Л.Мягмаржавт дэм хайрласан, уран бүтээл, авъяасыг нь үнэлсэн хандлага гэж ойлгож байна. Монгол зургийн аргаар шонхор зургийг бүтээнэ гэдэг гайхамшиг. Манай сургуулийн дэг сургалтыг цааш нь хөгжүүлж явж байгаад захирлын хувьд шавьдаа их баярлаж байна.

Сурвалжилсан Б.Баярмаа