НИЙТЛЭСЭН: 2018-04-25 17:59:07

Нийгэм > Орон нутаг | Сэтгэгдэл: 0

Ховд аймгийн төвд “Дулаан дамжуулах төв-16”-ийн барилгыг яаралтай ашиглалтад оруулахгүй бол Ховд Дулааны станц ТӨХК нь шинээр барилга барьсан компаниудад техникийн нөхцөл олгох боломжгүй болоод байгаа ажээ. Энэ талаар дөрөвдүгээр сарын 24-ний өдөр хуралдсан “Техникийн мэргэжлийн зөвлөл”-ийн хурлын үеэр холбогдох мэргэжилтнүүд мэдээллээ.

Ховд аймгийн Засаг даргын өнгөрсөн оны  5 дугаар сарын 22-ны өдрийн А| 221 дугаар захирамжийн дагуу аймгийн Засаг даргын дэргэдэх Ховд хотын инженерийн байгууламж бүхий бүсэд газрын зөвшөөрөл, техникийн нөхцөл олгох “Техникийн мэргэжлийн зөвлөл” байгуулагдсан юм.  Тус зөвлөл нь аймгийн ерөнхий болон хэсэгчилсэн төлөвлөгөөний дагуу газрын зөвшөөрөл, барилгын техникийн нөхцөл олгох ажлыг зохион байгуулж, тухайн барилга байгууламж нь ард иргэдийн эрүүл, аюулгүй, таатай орчинд ажиллаж, амьдрах нөхцөл боломжийг хангасан байх, байршил нь газар зохион байгуулалтын ерөнхий төлөвлөгөөтэй уялдаж байгаа эсэх, холбогдох хууль, дүрэм журам, норм стандартын шаардлага хангасан эсэх, тухайн инженерийн хангамжийн эх үүсвэрийн найдвартай байдал, хангах нөөц боломжийг судалсны үндсэн дээр шийдвэрлэн ажиллаж байна.
Энэ удаагийн хурлаар “Хатан түнгэл” ХХК-ийн 30 айлын орон сууц, “Тэгш стандарт” ХХК-ийн 30 айлын орон сууц, Прокурорын газрын 30 айлын орон сууц, “Бүтээмж таур” ХХК-ийн 30 айлын орон сууц, “Ховд-юхо” ХХК-ийн 16 айлын орон сууц, “Эрдмийн шим” ХХК-ийн 16 айлын орон сууцны барилгыг шинээр барих техникийн нөхцөл олгох талаар хэлэлцлээ.
Хурлын үр дүнд “Хатан түнгэл” ХХК-ийн 30 айлын орон сууцны техникийн нөхцөл олгох, дулаан, уур, хий, цэвэр, бохир ус, цахилгаан, харилцаа холбоо зэргээр хангах боломжтой гэсэн шийдвэр гаргав.
Мөн Ховд аймгийн хэсэгчилсэн ерөнхий төлөвлөгөөний А9 дүгээр бүс Магсаржав баг, ерөнхий боловсролын 3 дугаар сургуулийн орчимд 900 айлын орон сууцны барилга, 5 Гкал|ц ачаалалтай дулаан дамжуулах төв баригдахаар төлөвлөгдсөн байна.
Тухайн бүсэд “Ховд шинэ-Асар” ХХК-ийн 40 айл, “Гулзатын шил” ХХК-ийн 42 айл, “Залай алтай” ХХК-ийн 48 айл гэх мэт 240 айлын 1.5 Гкал|ц ачаалалтай орон сууцны барилга баригдсан. Үүнтэй холбогдуулан орон сууц, өсөн нэмэгдэх хэрэглээг хангахад ерөнхий боловсролын 3 дугаар сургуулийн хашаан дотор баригдах 5 Гкал|ц хүчин чадалтай “Дулаан дамжуулах төв-16”-г ашиглалтад оруулах зайлшгүй шаардлагатай байна.
Ховд аймгийн төвд “Дулаан дамжуулах төв-16”-ийн барилгыг 2015 оны 10 дугаар сард барилгын компаниуд нийлж барьсан боловч доторх тоног төхөөрөмж суурилуулах төсөв мөнгөгүйн улмаас одоо болтол ашиглалтад ороогүй байна. Одоогийн байдлаар “Ховд Дулааны станц“ ТӨХК нь ерөнхий боловсролын 3 дугаар сургуулийн орчмын барилгуудыг Усан бассейны “Дулаан дамжуулах төв-15”-аас хангаж байгаа боловч хүчин чадал хэтэрсэн, тоног төхөөрөмж дутуу учир айл өрхийн хэрэгцээний халуун усаар хангаж чадахгүй байгаа талаар холбогдох мэргэжилтнүүд мэдээлэв.
Иймд тулгамдаж байгаа дэд бүтцийн асуудлыг шийдвэрлэхгүй бол Ховд Дулааны станц ТӨХК нь техникийн нөхцөл хүссэн компаниудад техникийн нөхцөл олгох боломжгүй юм. Уг асуудлыг шийдвэрлэх талаар аймгийн Техникийн мэргэжлийн зөвлөл дахин хуралдахаар боллоо.