Монголын төр, нийгмийн нэрт зүтгэлтэн, БНМАУ-ын баатар, Хөдөлмөрийн баатар, Маршал Юмжаагийн Цэдэнбалын мэндэлсний 101 насны ой есдүгээр сарын 17-ны өдөр боллоо.  Нэрт төрийн зүтгэлтэн тэрбээр 1916 оны есдүгээр сарын 17-ны өдөр төрсөн ажээ.

Түүний төрсөн өдрийг тохиолдуулан УИХ-ын гишүүн Ө.Энхтүвшин, Я.Содбаатар, Б.Бат-Эрдэнэ, Ч.Хүрэлбаатар,  Н.Цэрэнбат болон МАН-ын удирдах зөвлөлийн ажлын алба болон иргэдийн төлөөллүүд , хамаатан садангийн төлөөлөл зэрэг хүмүүс маршал Ю.Цэдэнбалын гэрэлт хөшөөнд цэцэг өргөж, хүндэтгэл үзүүллээ. Энэ үеэр зарим гишүүд үзэл бодол, сэтгэгдлээ илэрхийлэв.

Цэцэг өргөх ёслолыг нээж МАН-ын Ерөнхий нарийн бичгийн дарга Д.Амарбаясгалан үг хэлэхдээ “Төрт ёс, түүхт соёлоо нандигнан уламжилж, хүндэтгэн дээдэлдэг манай ард түмний сэтгэл зүрхэнд ХХ зууны Монголын төрийн гарамгай удирдагч, БНМАУ-ын Ардын их хурлын тэргүүлэгчдийн дарга, сайд нарын зөвлөлийн дарга, эрх баригч намын дарга зэрэг төрийн болон улс төрийн өндөр албан тушаалд тасралтгүй 40 гаруй жил ажилласан Юмжаагийн Цэдэнбал ямар өндөр байр суурь эзэлдгийг өнгөрсөн онд тохиосон түүний 100 жилийн ой гэрчлэн харуулсан билээ. Монгол Улсын төрийн эрх барих, Хууль тогтоох дээд байгууллага УИХ-аас гаргасан “Юмжаагийн Цэдэнбал агсны амьдрал, үйл ажиллагааны талаарх түүхэн үнэнийг ард түмэнд тайлбарлан таниулах, алдар гавьяаг нь мөнхжүүлэх тухай 29 дүгээр тогтоол”-ыг манай эх орны өнцөг булан бүрт хэрэгжүүлж, буурал даргынхаа мэндэлсний тэгш дүүрэн ойг өргөн дэлгэр тэмдэглэснийг та бүхэн сайн санаж байгаа байх.

Харин өнөөдөр түүний мэндэлсний 101 жилийн ой тохиож байна. Түүний бүтээж босгосоныг бид жил бүрийн энэ өдөр эргэн санаж, Маршалынхаа гэрэлт хөшөөнд хүндэтгэл үзүүлдэг уламжлалтай билээ. Монгол орон бүхэлдээ сэрсэн ХХ зууны их хөгжлийн жилүүдэд монголчууд бүгдээрээ бичиг үсэгтэн болж, монгол хүн эрүүлжин саруулжиж, Монголын далбаа НҮБ-д мандан, урлаг соёл спортоор дэлхий дахинд танигдаж, Монголын нэр ертөнцийн дэвжээнд гарсан билээ. Түүнчлэн Дархан, Эрдэнэтээр түүчээлсэн их бүтээн байгуулалт, аж үйлдвэрийн хөгжил, Алс Дорнодын талаас Алтай Таван богд хүртэл Умардын их тайгаас Өмнөдийн Элсэн манхан хүртэл үргэлжилж байсныг бид мартах учиргүй. Энэ агуа эрхэм үйл хэргийг бүтээн байгуулах ариун цагаан фронтыг Юмжаагийн Цэдэнбал удирдаж байсан нь мартагдашгүй үнэн юм.

Монгол орон бүхэлдээ сэрсэн ХХ зууны их хөгжлийн жилүүдэд монголчууд бүгдээрээ бичиг үсэгтэн болж, монгол хүн эрүүлжин саруулжиж, Монголын далбаа НҮБ-д мандан, урлаг соёл спортоор дэлхий дахинд танигдаж, Монголын нэр ертөнцийн дэвжээнд гарсан билээ.

Хоногийн 4-5-хан цагт нь амарч, бусад үед эх орныхоо хөгжил дэвшлийн төлөө эцэж цуцалтгүй ажиллаж, нэгэн зууны тэн хагасыг элээсэн буурал даргынхаа амьдрал үйл ажиллагаанаас суралцаж, өөрийнх нь хэлснээр “Ариун цагаан хөдөлмөрөөс хүний сайн сайхан амьдрал төрдөг” гэсэн үгийг алхам тутамдаа санаж явахад буруудахгүй юм. Монгол Улсын түүхэнд өөрийн хийж бүтээснээрээ томоохон байр суурийг эзэлсэн ХХ зууны гарамгай улс төрч Юмжаагийн Цэдэнбалын алдар гавьяа, он цаг өнгөрөх тусам улам тодорч, Монголын ард түмний сэтгэл зүрх, оюун санаанд үүрд гэгээнээр дурдагдаж, улам бүр хүндлэгдэн хайрлагдах учиртай гэж бид боддог. Сайн үйлс дэлгэрэх болтугай” гэж тодотгон тайлбарласан юм.

Б.Баярмаа